Свята без цяпла :: Хартыя'97 :: Навiны

Дзіцячы садок, школа, паліклініка і частка жылых дамоў у пасёлку Яроміна Гомельскага раёну засталіся без ацяпленьня й гарачай вады. Прычына гэтаму — паломка абсталяваньня кацельні ў калгасе імя XXII зьезду КПСС, якая ацяпляе гэтую частку паселішча. Аварыя адбылася яшчэ 11 сьнежня. Сельсавет загадаў закрыць дзіцячы садок і дазволіў не наведваць школу вучням малодшых клясаў. А вучні старэйшых клясаў прыходзяць на заняткі ў верхняй вопратцы, і сядзяць у класах, не здымаючы пальчатак.

У канторы калгасу вельмі холадна. Як паведаміў БелаПАН 14 сьнежня намесьнік старшыні гаспадаркі Юрый Феафілаў, у кацельні зламаўся адзін з двух насосаў, а таксама пацяклі адразу ўсе чатыры катлы. Паводле ягоных словаў, абсталяваньне кацельні настолькі старое, што прамысловасьць ужо даўно не выпускае такой прадукцыі. «Дзіркі» латаюцца падручным матэрыялам, а адпаведную помпу знайшлі ў Менску. Юрый Феафілаў заявіў, што, верагодна, цяпло паступіць не раней, чым праз тыдзень.

Трэба адзначыць, што літаральна днямі Гомельскі райвыканкам адзначыў 75-годзьдзе раёну. Грошы на ўрачыстасьці зьбіралі ў тым ліку і з прадпрымальнікаў, іх часам шантажыравалі нявыдачай ліцэнзіі або адмовай у рэгістрацыі. Дарэчы, матэрыялы, якія сьведчаць аб гэтым, накіраваны ў абласную пракуратуру. А на прафілактыку абсталяваньня кацельні сродкаў у раёне своечасова не знайшлося.