Запазычанасьць па заробку на Гомельшчыне склала амаль 10 міліярдаў :: Хартыя'97 :: Навiны

Запазычанасьць па заробку на Гомельшчыне на пачатак сьнежня склала амаль 10 міліярдаў рублёў. Па дадзеных абласнога ўпраўленьня статыстыкі, каля 94 тысяч жыхароў Гомельскай обласьці цалкам ці часткова не атрымалі свой заробак своечасова. Праўда, паводле тых самых статыстычных дадзеных, у лістападзе ўдалося пагасіць большую частку пазыкаў за жнівень і верасень на суму ў 5 з паловаю міліярдаў рублёў.

Асноўная частка запазычанасьці прыпадае на сельскагаспадарчыя прадпрыемствы Гомельскай вобласьці, дзе яна пераўзыходзіць 7 міярдаў. У гэтай сфэры гаспадараньня 66 тысячаў работнікаў, ці больш за 80 адсоткаў ад усіх занятых у сельгасвытворчасьці, своечасова не атрымалі заробак.

На прамысловых прадпрыемствах Гомельшчыны становішча трохі лепей. Тут пазыкі склададаюць усяго паўтары міліярды рублёў. Прычым большая палова запазычанасьці прыпадае на прадпрыемствы машынабудаваньня й металаперапрацоўкі.

На фоне гэтых праблемаў у аграпрамысловым комплексе Гомельскай вобласьці можна толькі парадавацца за работнікаў чыгуначнага і авіяцыйнага транспарту, сувязістаў й медыкаў. Прадстаўнікоў культуры й мастацтва – ім заробак выплачаны цалкам.

На дадзены час Гомельскі аблвыканкам, выканаўчая ўлада на месцах прымаюць самыя энэргічныя меры для пагашэньня пазыкаў па заробках. На адным з апошніх паседжаньняў абласнога аблвыканкаму перад суб’ектамі гаспадараньня стаіць дакладная задача – выплаціць заробак уключна па лістапад да конца году. Аднак пошук неабходных для гэтага сродкаў застаецца самым балючым пытаньнем для ўладаў і кіраўнікоў прадпрыемстваў.