Андрэй Саньнікаў: пры Лукашэнку Беларусь выконвае ролю статыста :: Хартыя'97 :: Навiны

Беларусь крытычна настроена да нядаўняга рашэньня Адміністрацыі Джорджа Буша аб выхадзе ЗША з Дамовы аб супрацьракетнай абароне 1972 году. Аднак, на думку міжнароднага каардынатар Хартыі’97 Андрэя Саньнікава, палітыка Аляксандра Лукашэнкі прывяла да таго, што пазыцыя Беларусі сёньня не ўплывае на рашэньне важных стратэгічных пытаньняў. Наўрадці кагосьці цікавіць пазыцыя Беларусі ў гэтай сувязі.

Паводле словаў былога намесьніка міністра замежных справаў, міжнароднага каардынатара Хартыі’97 Андрэя Саньнікава, “Беларусь зьнікла зь міжнароднай арэны, і перш усяго, у пытаньнях стратэгічных”. Насамрэч, жаданьне афіцыйнага Менску далучыцца да афармленьня новых дамоўленасьцяў у галіне міжнароднай бясьпекі выклікае тоькі спачуваньне. Ці можа Беларусь разьлічваць на тое, што да ейнага голаса будуць прыслухоўвацца?

“Калі б мы былі б іншай краінай, то нашая пазыцыя павінна была б улічвацца. Я нагадаю: дамовы ў галіне стратэгічных ядзерных узбраеньняў былі заключаныя з Савецкім саюзам. Правапераемнікам Савецкага саюзу ў галіне ядзерных дамоўленасьцяў былі ня толькі Расея, але і Беларусь, Украіна. Казахстан. Мы вялі перамовы з ЗША. Мы сталі ўдзельнікамі ўсіх дамоўленасьцяў, якія былі заключаныя паміж ЗША й СССР. Але мы сёньня згубілі гэтыя пазыцыі. Я ведаю, што зараз Украіна можа ўплываць на пэўныя працэсы і ейны голас можа ўлічвацца ў абмеркаваньні такіх стратэгічных пытаньняў. А паколькі мы згубілі гэтыя пазыцыі, то пра Лукашэнку мы можам выконваць толькі ролю статыста: ніхто ня будзе лічыцца з нашай пазыцыяй, бо няма гэтай пазыцыі, нама пазыцыі, абарончай да нацыянальных інтарэсаў Беларусі”, -- заявіў у інтэрвію Радыё Рацыя каардынатар Хартыі’97 Андрэй Саньнікаў.