Беларускі і ўкраінскі прэм’еры не дамовіліся :: Хартыя'97 :: Навiны

У Чарнігаве ўчора завяршыліся беларуска-украінскія перамовы аб гандлёва-эканамічным супрацоўніцтве. Прэм’ер-міністар Беларусі Генадзь Навіцкі і прэм’ер-міністар Украіны Анатоль Кінах, якія ачолілі дэлегацыі абедзьвюх краінаў, не дамовіліся па пытаньні фінансавых ўзаемаадносінаў. Прычынаю для сустрэчы стаў дзяржаўны доўг Украіны перад Беларусьсю. Памеры якога сталі прадметам разнагалосься бакоў.

Згодна папярэдніх дамоўленасьцяў Кіеў абавязаўся выплаціць Менску 113 млн.даляраў, частку зь якіх меркавалася кампэнсаваць нерухомасьцю ў Крыму. Аднак, як заявіў пасьля сустрэчы галава беларускага ўраду, “украінскі бок наогул прыбрала гэты пункт” і зьнізіла суму доўга да 51 млн.даляраў. Г.Навіцкі назваў гэта “новай умоваю Украіны” і заявіў, што пытаньне ратыфікацыі беларускім парлямэнтам дамовы аб усталяваньні беларуска-ўкраінскай мяжы залежыць ад урэгуляваньня гэтай праблемы.

У сваю чаргу, Кіеў незадаволены станам двухбаковага гандлёва-эканамічнага супрацоўніцтва. На сёньня гадавы таваразварот дзьвюх краінаў складае 700 млн.даляраў. І ягонае павелічэньне афіцыйная Украіна, па словах прэсавага сакратара ўкраінскага прэм’ера Сяргея Нагаранскага, як раз і зьвязвае “з пашырэньнем прымежнага супрацоўніцтва, перш усяго, прымежных абласьцей”.