Старшыня ФПБ зьвярнуўся з пратэстам у Канстытуцыйны суд :: Хартыя'97 :: Навiны

Старшыня Федэрацыі прафсаюзаў Беларускай Уладзімер Ганчарык накіраваў ліст да старшыні Канстытуцыйнага суда Рэспублікі Беларусь Рыгора Васілевіча з просьбай даць заключэньне аб адпаведнасьці Канстытуцыі Рэспублікі Беларусь пастановы Савміну Рэспублікі Беларусь “Аб мерах па абароне правоў членаў прафэсійных саюзаў”.

Нагадаем, што 14 сьнежня 2001 году ў аднабаковым парадку Савет Міністраў праігнараваў прынцыпы, замацаваныя ў частцы другой арт. 14 Канстытуцыі Рэспублікі Беларусь і арт.353 Працоўнага кодэксу Рэспублікі Беларусь. Савет Міністраў Рэспублікі Беларусь прыняў пастанову №1804 “Аб мерах па абароне правоў членаў прафэсійных саюзаў”.

Прэзыдыўм Савету ФПБ разглядзеў дадзеную пастанову і прыйшоў да высновы, што гэты падзаконны акт супярэчыць Канстытуцыі, агульнапрынятым міжнародна-прававым актам і законам рэспублікі. Ён не абараняе, а наадварот, прыціскае правы членаў прафэсійных саюзаў на свабоднае распараджэньне сваім заробкам і той доляй, якая зь іх пісьмовага дазволу пераводзіцца ў выглядзе членскіх узьнёскаў прафсаюзам.

Старшыня ФПБ расцэньвае пастанову Савміну як умяшальніцтва ва ўнутраныя справы прафсаюзаў і падрыў арганізацыйна-фінансавай базы дзейнасьці прафэсійных саюзаў рэспублікі. Прынятая пастанова парушае таксама агульнапрынятыя нормы міжнароднага права – Канвенцыяй Міжнароднай аргнізацыі працы забараняецца ўціскаць працоўных у свабодным распараджэньні сваім заробкам, і прадугледжваецца магчымасьць безнаяўнага цэнтралізаванага афармленьня ўплаты членскіх прафсаюзных унёскаў.

Зь ліста лідэра прафсаюзаў вынікае, што Камітэт па свабодзе аб’яднаньня Міжнароднага бюро працы лічыць, што “пазбаўленьне прафсаюзу магчымасьці ўтрымліваць ўнёскі з заробку магло б прывесьці да фінансавых цяжкасьцяў для яго, што не садзейнічае разьвіцьцю гарманічных працоўных зносінаў, і такой сытуацыі варта пазьбягаць”.