Польшча абмяжоўвае нормы ўвозу алкаголю й цыгарэтаў :: Хартыя'97 :: Навiны

З новага году польскі ўрад вырашыў зьменшыць нормы ўвозу ў краіну алкагольных напояў і цыгарэтаў. Для тысячаў жыхароў беларускага памежжа, якія ўвозяць такія тавары на продаж у Польшчу – гэта азначае адсутнасьць заробку, які часам зьяўляецца адзінай крыніцай даходаў.

Перашапачаткова паведамлялася, што новыя абмежаваньні тычацца толькі польскіх грамадзянаў, якія жывуць у памежных раёнах. Аднак сёньня, у аддзеле інфармацыі польскай мытні карэспандэнту Радыё Свабода паведамілі, што зьмены нормаў увозу алкагольных і тытунёвых вырабаў у Польшчу распаўсюджваецца й на замежных грамадзян.

Такім чынам, з 1 студзеня наступнага году, адна асоба можа легальна ўвозіць толькі паўлітры алкагольных напояў і адзін блёк цыгарэт. Да гэтага алкаголю можна было вывезьці ў два разы болей, а цыгарэтаў – 18 блёкаў.

Польскі ўрад тлумачыць гэтыя абмежаваньні неабходнасьцю барацьбы з дробнымі гандлярамі, якія штодзённа ўвозяць у Польшчу вялікую колькасьць цыгарэтаў, і прадаюць іх па кошту, больш нізкім чым у крамах.

Праз гэта польскі бюджэт губляе каля паўміліярды даляраў. А напярэдадні зачыніліся некалькі цыгарэтных фабрык. Паводле дасьледаваньняў польскіх вытворцаў тытунёвых вырабаў, у памежных зь Беларусьсю Падляскім ваяводзтве, 70% выпаленых цыгарэтаў – кантрабандныя.

Па другі бок мяжы, з гандлю цыгарэтамі й гарэлкай жывуць тысячы беларусаў, якія часам езьдзяць у Польшчу нават двойчы на дзень. Напрацягу месяца такім чынам можна зарабіць каля 100 даляраў, да гэтага яшчэ можна сэканоміць калі набываць у суседняй краіне больш танныя прадукты харчаваньня.

Зараз жыхары Берасьцейшчыны і Гардзеншчыны, якія займаліся памежным гандлем, будуць вымушаныя шукаць новыя заробкі. А ўладам памежных раёнаў дадасца клопатаў, таму што частка былы гандляроў, напэўна, зьвернецца на біржы працы.

Губляюць заробкі і звольняць работнікаў шэраг польскіх прадпрымальнікаў, якія ўтрымліваюць свае гандлёвыя прадпрыемствы ў памежных раёнах коштам турыстаў Беларусі й Украіны. Але пра памеры згубаў польскага боку ад увядзеньня новых мытных правілаў пакуль не паведамляецца.