Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Незаўважна для міжнароднай грамадзкасьці Аляксандар Лукашэнка ўзмацняе ціск на апазыцыю. Праз тры месяцы пасьля выбараў прэзыдэнта Беларусі, вынікі якіх можна было б аспрэчваць, галава дзяржавы Аляксандар Лукашэнка паведаміў аб лібэралізацыі эканомікі. Аднак рэфарматарскія намеры сутыкаюцца са скепсысам з боку апазыцыі: яна скардзіцца на ўзмацненьне рэпрэсіяў.
Сьведчаньні “засакрэчаных” сьведкаў даказваюць удзел Ігнатовіча й ягоных паплечнікаў у шматлікіх забойствах беларускіх грамадзянаў. Нагадаем, што ў Менскім абласным судзе працягваецца працэс над былым спэцназаўцам Валерыям Ігнатовічам, якога акрамя іншага, абвінавачваюць у выкраданьні ў ліпені мінулага году аператара ГРТ Зьмітра Завадзкага. Гэты эпізод ужо разглядаўся ў судзе, але, згодна крыніцам, да гэтага часу няма пэўных адказаў на пытаньні, што насамрэч здарылася з Завадзкім і дзе ён зараз знаходзіцца. Затое хапае доказаў у зьдзяйсненьні групоўкаю Ігнатовіча іншых злачынстваў і сьведчаньняў пра ягоныя шчыльныя сувязі зь беларускімі спэцслужбамі.
Становішча, у якім апынулася эканоміка, замежныя экспэрты называюць “вельмі песымістычным”. Нядаўна ў нашай краіне працаваў экспэрт Сусьветнага банку Ўлад Крэячыч, паведамляе Радыё Рацыя. Ён дасьледаваў стан 625 прыватных прадпрыемстваў у розных рэгіёнах і выкарыстоўваў афіцыйную статыстычную інфармацыю за апошнія некалькі гадоў. Па ягоных словах, з аднаго боку, беларускія прадпрымальнікі маюць цяжкасьці з-за немагчымасьці складаць канкурэнцыю з расейскімі вытворцамі, а з другога - атмасфэра, у якой ім даводзіцца працаваць, горшая, чым у іншых краінах СНД.
Падчас свайго знаходжаньня ў Маскве Аляксандар Лукашэнка заявіў, што "настало время расставить все точки над "i". Ён патлумачыў, што мае на ўвазе неабходнасьць “или реализовать договор и программу формирования единого государства, или внести в эти документы серьезные коррективы, сделав это максимально публично и гласно”. Па словах Лукашэнкі, курс на аб’яднаньне з Расеяй зьяўляецца для яго прыярытэтам і непазьбежнасьцю, а адступленьне ад гэтага курсу беларускі лідэр назваў сваёй “палітычнай сьмерцю”. Адначасова, можна сказаць, што ўсе прагнозы адносна вынікаў візыту Лукашэнкі апраўдаліся: бакі так і не падпісалі найбольш важныя дакумэнты, ня зроблена нават сумеснай заявы двух прэзыдэнтаў.
“Забарона сыстэмы безнаяўнага пералічэньня прафсаюзных унёскаў зьяўляецца парушэннем Канвэнцыі №87 МАП, якая ўстаноўлівае паўсюднае права работнікаў на свабоду аб’яднаньня”, -- гаворыцца ў лісьце генэральнага сакратара Міжнароднага саюзу работнікаў харчовай і тытунёвай прамысловасьці, сельскай гаспадаркі, абслугоўваньня рэстарацыяў і гатэляў, грамадзкага харчаваньня й сумежных галінаў Рона Освальда Аляксандру Лукашэнку.
Аршанскі гарвыканкам пастанавіў пазбавіць прадпрымальніцкай ліцэнзіі рэдактара незалежнай газэты “Куцейна” Віктара Андрэева. Са словаў рэдактара, пра тое, што яго вырашылі пазбавіць права на прадпрымальніцкую дзейнасьць, ён даведаўся выпадкова. Як высьвятлілася, яшчэ 5 сьнежня прайшло паседжаньне аршанскага гарвыканкаму, дзе прынялі адпаведнае рашэньне. Але афіцыйнае пісьмовае пацьверджаньне гэтаму Віктар Андрэеў атрымаў толькі напярэдадні Калядаў і толькі пасьля асабістага звароту ў гарвыканкам.
У Беларусі зьнізілася аплата энэргіі "жывымі грашыма", паведамілі ў дзяржаўным энэргетычным канцэрне. Паводле інфармацыі спэцыялістаў "Белэнэрга", за адзінаццаць месяцаў гэтага году спажыўцамі ў грашовай форме аплочана 35,4% спажытай энэргіі (агульная аплата - 85,7%), у той час аплата за 2000 год склала 44,7%. Практычна ўсе міністэрствы й канцэрны перавышаюць усталяваныя ўрадам улетку гэтага году межавыя нарматывы неграшовай формы спыненьня забавязаньняў па разьліках за ўжытую электрычную й цеплавую энэргію.
1,5 міліярды рублёў – такая пазыка лекарскіх установаў Гомельшчыны за атрыманыя лекі. Нягледзячы на гэта, фармацэўтычныя фірмы пагадзіліся пастаўляць лекі ў пазыку. Як паведамілі БелаПАН ва ўпраўленьні аховы здароўя Гомельскага аблвыканкаму, лякарскія ўстановы зьвярнуліся і да гандлёвых прадпрыемстваў з просьбай пастаўляць у пазыку ў шпіталі прадукты харчаваньня, але пакуль узаемапаразуменьня дасягнуць не атрымалася. Гэта ў сваю чаргу негатыўна паўплывала на якасьць харчаваньня хворых, паколькі бюджэтныя асыгнаваньні на гэты артыкул амаль выдаткаваныя.
Напярэдадні калядных сьвятаў лідзкія півавары зрабілі падарунак спажыўцам. За кошт зьмяншэньня з 30 да 20 адсоткаў гандлёвых нацэнак у сваіх фірмовых крамах яны зьнізілі кошты. На такі крок пайшла адміністрацыя разьмешчаных у Лідзе прадпрыемстваў, якія гандлююць прадукцыяй мясцовага піўзаводу. У выніку піва “Лідзкае клясычнае”, напрыклад, стала больш танным, амаль на 60 рублёў.
, iнформэр
