Былога дырэктара “Атланту” перавялі з СІЗА ў “Навінкі” :: Хартыя'97 :: Навiны

Былога дырэктара “Атланту” Леаніда Калугіна зьмесьцілі ў псыхіятрычны шпіталь “Навінкі” ў мінулую сераду, але адвакату пра гэта стала вядома толькі вечарам у пятніцу ад сваякоў Калугіна. Адвакат Пыльчанка ўпэўнены, што сьледзтва наўмысна абыйшло закон, які патрабуе адмысловае пастановы сьледчага, калі арыштанта неабходна зьмесьціць на экспэртызу ў стацыянар.

“Гэта парушэньне закону. Мусіць быць пастанова, зь якой знаёмяцца і абаронцы, і ён сам. Калі чалавека аглядаюць амбуляторна, тады пастанова не патрабуецца, а яго паклалі адразу ў стацыянар – тут без пастановы нельга, але мне да гэтага часу нічога невядома”, -- паведаміў Радыё Свабода адвакат Пыльчанка.

Тое, што Леаніда Калугіна адразу накіравалі ў псыхіятрычны стацыянар, па словах адваката, таксама супярэчыць прынятай практыцы. “Такіх выпадкаў я ня ведаю. Вядома, гэта магчыма, калі чалавек раней хварэў, у яго былі нейкія прыпадкі, але наколькі мне вядома, з Калугіным нічога такога не было”, -- кажа адвакат.

Адвакат мае дзьве вэрсіі, чаму Калугіна адправілі ў псыхіятрычны шпіталь. Згодна першай, сьледчыя спрабуюць працягваць расьсьледаваньне, а дастатковых падставаў для гэтага няма. З дня затрыманьня былога дырэктара “Атланта” прайшло амаль два месяцы, аднак доказаў віны Калугіна, па словах адваката, не відаць, і зьявілася небясьпечнасьць, што пракурор, які назірае за сьледзтвам, можа не падоўжыць тэрмін расьсьледаваньня. Таму сьледчыя могуць спадзявацца, што за месяц, у які будзе рабіцца псыхіятрычная экспэртыза, яны знойдуць дастатковыя доказы віны Калугіна.

А згодна другой вэрсіі, Калугіна зьмесьцілі ў “псіхушку”, каб зламіць ягоную волю, прымусіць стаць больш згаворлівым. “Мой падабаронны з самага пачатку не вызнае себя віноўным. Сьледчыя раілі яму ня быць такім несаступлівым. Але ён не зьмяніўся. У выніку сьледчыя дзеяньні з удзелам Калугіна практычна спыніліся. Так, за апошнія дзесяць дзён з ягоным удзелам прайшоў толькі адзін допыт”, -- паведаміў Аляксандар Пыльчанка.

У Дэпартамэнце фінансавых расьсьледаваньняў Камітэту дзяржкантролю, які вядзе справу экс-дырэктара “Атланту”, камэнтаваць зьмяшчэньне Калугіна ў “Навінкі” адмовіліся.