У Курапатах зноў усталяваны мэмарыяльны знак ахвярам рэпрэсыяў :: Хартыя'97 :: Навiны

Ва ўрочышчы Курапаты адбылася цырымонія адкрыцьця адбудаванага мэмарыяльнага знаку “Ад народу ЗША народу Беларусі”. Мэмарыяльны знак ва ўрочышчы Курапаты на месцы масавых захаваньняў ахвяраў сталінскіх рэпрэсіяў быў усталяваны 15 студзеня 1994 году. У ягоным адкрыцьці прымаў удзел прэзыдэнт ЗША Біл Клінтан, аднак летам мінулага году ён пацярпеў ад дзеяньняў вандалаў. У цырымоніі адкрыцьця адноўленага за кошт амбасады ЗША мэмарыяльнага знаку прыняў удзел Надзвычайны й Паўнамоцны Амбасадар ЗША ў Беларусі Майкл Козак. У сваім выступе дыплямат заявіў, што дадзены мэмарыяльны знак зноў адноўлены ў памяць аб ахвярах сталінскіх рэпрэсіяў, бо толькі памяць аб той трагедыі можа прадухіліць ейнае паўтарэньне. Пасьля гэтага Козак запаліў на лаве сьвечку й папрасіў усіх прысутных памянуць людзей, захаваных у Курапатах, хвілінаю маўчаньня.

У цырымоніі адкрыцьця мэмарыяльнага знаку “Ад народа ЗША народу Беларусі” прынялі ўдзел главы замежных дыпляматычных прадстаўніцтваў, вядомыя беларускія апазыцыйныя палітыкі, творчая інтэлігенцыя, журналісты.

Ва ўрачыстым мерапрыемстве прымалі ўдзел абаронцы Курапатаў – больш за 70 актывістаў руху ЗУБР, каля 10 прадстаўнікоў Маладога Фронту і каля 20 сябраў Беларускай партыі свабоды. У сувязі з гэтым, адкрыцьцё мэмарыяльнага знаку не абыйшлі ўвагаю праваахоўчыя органы. Некалькі мікрааўтобусаў з АМАПам стаялі на будаванай каля Курапатаў кальцавой аўтадарозе, аднак цырымонія прайшла спакойна, і АМАП ня быў задзейнічаны.