Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Ганс-Георг Вік чатыры гады ачольваў місію АБСЭ ў Менску; ейнай мэтай было разьвіцьцё грамадзянскай супольнасьці, дэмакратыі й плюралізму. Да канца 2001 году ён быў вымушаны пакінуць краіну. Сёньня рада АБСЭ ў Вене абмяркоўвае будучыню назіральнае групы; ейны мандат не абмежаваны па часе. З дапамогаю маніпуляцыяў вакол рэферэндуму па асноўным законе прэзыдэнт Лукашэнка разьвітаўся з дэмакратычнай канстытуцыяй, што была прынятая ў 1994 годзе. У прамыслова разьвітай краіне зь дзесяцьцю мільёнамі жыхароў ён усталяваў аўтарытарны рэжым, як гэта было пры камуністычнай партыі ў часы Савецкага Саюзу: кантроль прэзыдэнта й ягонай адміністрацыі за заканадаўчай і судовай уладаю; бюджэт не падлягае кантролю з боку парлямэнту і нават не публікуецца. Абраны парлямэнт заменены прызначаным, а ягоныя паўнамоцтвы моцна скарочаныя, усталяваная манаполія дзяржавы на электронныя й дзяржаўныя друкаваныя СМІ. Асноўныя прадпрыемствы засталіся ў дзяржаўнай уласнасьці і пад дзяржаўным кантролем; мясцовае самакіраваньне замяніла вертыкальная сыстэма кіраваньня.
Працоўны калектыў Менскага трактарнага заводу зьвярнуўся з адкрытым лістом да Аляксандра Лукашэнкі, у якім папрасіў узяць справу Міхаіла Лявонава пад асабісты кантроль, вызваліць яго з-пад варты і вярнуць на завод. "Тыя дзеяньні, якія ажыцьцяўляліся работнікамі Пракуратуры Беларусі ў дачыненьні да генэральнага дырэктара МТЗ Лявонава 07.01.2002 г. выклікалі ў калектыве беларускіх трактарабудаўнікоў шокавы стан, - гаворыцца ў лісьце. - Асабліва іх бесцырымоннасьць. Мы шмат пабачылі ў сваім жыцьці, асабліва за апошнія шэсьць гадоў, але дайсьці да апошняй крайнасьці ў дачыненьні да лідэра дырэктарскага корпусу краіны, які так шмат зрабіў для роднага заводу й краіны ў цэлым, патрыёта Беларусі - гэта ніяк ня можа пакінуць абыякавым калектыў прадпрыемства... Мы зусім ня супраць прыцягненьня да адказнасьці людзей, якія парушаюць законы. Але спачатку неабходна сабраць доказы іх вінаватасьці, а потым саджаць за краты, а не наадварот. Гэта аксіёма для ўсёй сусьветнай супольнасьці, дык чаму яна парушаецца ў нас? Арышт Лявонава М.В. мы лічым найгрубейшай працэсуальнай памылкай Пракуратуры Рэспублікі Беларусь".
У інтэрвію “Народнай волі”, апублікаваным 15 студзеня гэтага году, экс-кандыдат у прэзыдэнты Беларусі Сяргей Гайдукевіч агучыў такі факт: 500 беларускіх трактараў па загаду Адміністрацыі прэзыдэнта й асабіста Ўладзімера Замяталіна трапілі ў рукі пасярэдніцкай іракскай фірмы. “Лявонаў, наколькі я ведаю, катэгарычна не хацеў падпісваць гэты кантракт. Аднак яго вымусіў зрабіць гэта Замяталін”, – сказаў Сяргей Васільевіч. “Дарэчы, сума таго кантракту складала больш пяці мільёнаў даляраў. Ці ня тыя гэта грошы, за якія зараз сядзіць Лявонаў?” – канстатаваў Гайдукевіч. У рэдакцыю “Народнай волі” трапілі некаторыя дакумэнты, якія выкрываюць дэталі гэтага кантракту.
Палітытчны камітэт Парлямэнцкай асамблеі Рады Эўропы не плянуе абмеркаваньне беларускага пытаньня падчас парлямэнцкай сэсіі ў Стразбургу, якая пройдзе з 21 па 26 студзеня. Пра гэта БелаПАН стала вядома са структураў ПАРЭ. І ўсё ж такі беларуская праблематыка ў Стразбургу будзе абмяркоўвацца, праўда, у больш вузкіх рамках. 24 студзеня Камітэт па адукацыі, культуры й СМІ Беларусі ПАРЭ плянуе абмеркаваць сытуацыю з мас-медыя ў Беларусі. На гэтыя слуханьні запрошаныя дзьве дэлегацыі – ад дзяржаўных СМІ на чале зь міністрам інфармацыі Міхаілам Падгайным і ад недзяржаўных на чале з прэзыдэнтам Беларускай асацыяцыі журналістаў Жанай Ліцьвіной.
Парлямэнцкая дэлегацыя Беларусі на чале са старшынём “савету рэспублікі” Аляксандрам Вайтовічам наведае з афіцыйным візытам Кітай з 17 па 24 студзеня. У праграме знаходжаньня заплянаваны прыём у старшыні Сталага Камітэту Ўсекітайскага сходу народных прадстаўнікоў Лі Пэна, сустрэчы з намесьнікам старшыні КНР Ху Цзіньтао, намесьнікам прэм’ера Дзяржаўнага Савету КНР, членам Палітбюро ЦК КПК Цянь Цічэнь і іншымі дзяржаўнымі дзеячамі. У склад дэлегацыі ўключаныя прадстаўнікі аграпрамысловага комплексу рэспублікі, прамысловых прадпрыемстваў, юрысты, эканамісты. Яны падчас перамоваў спрабуюць зьмяніць на розных узроўнях беларуска-кітайскія зносіны, якія на дадзены момант, па словах Надзвычайнага й Паўнамоцнага Амбасадара Беларусі ў КНР Уладзімера Русакевіча, пакідаюць жадаць лепшага.
Міністар замежных справаў Беларусі Міхаіл Хвастоў, які знаходзіцца ў Трыпалі з працоўным візытам, правёў шэраг сустрэч з кіраўніцтвам Лібіі. Глава МЗСу сустрэўся з сакратаром Вышэйшага народнага камітэту (прэм’ер-міністрам) Лібіі Абдалой Аш-Шамехам, намесьнікам старшыні вышэйшага народнага кангрэсу Лібіі па зьнешніх сувязях Сулейманам Шэхумі і сакратаром Вышэйшага народнага камітэту па зьнешніх сувязях і міжнародным супрацоўніцтве (міністрам замежных справаў) Лібіі Махамедам Шальгамам.
Да 1-га лютага павінна скасавацца пастанова Савету Міністраў Беларусі аб адмене безнаяўнай аплаты членскіх прафсаюзных унёскаў. У супраціўным выпадку шахцёры правядуць 5-хвілінную папераджальную забастоўку і дзень прафсаюзнай салідарнасьці, паведамляе “Саюз-інфо”. Такую рэзалюцыю прыняў агульнагарадзкі мітынг гарнякоў і будаўнікоў Салігорску Менскай вобласьці. Ягонымі ініцыятарамі выступілі Незалежны прафсаюз гарнякоў і прафсаюзны камітэт хімікаў.
Камітэт дзяржаўнай бясьпекі Беларусі накіраваў у Федэральную службу бясьпекі Расеі ліст наконт публічных выказваньняў кіраўніка аддзелу адмысловых інфармацыйных праектаў ГРТ Паўла Шарамета. Зьмест гэтага дакумэнта ў тым, што публічныя выступы Паўла Шарамета шкодзяць канстытуцыйнаму ладу Беларусі, маюць антыдзяржаўны характар, дыскрэдытуюць кіраўніцтва Беларусі, і ў выніку, псуюць стасункі дзьвюх дзяржаваў.
Бэрлінскае бюро дэпутата Бундэгстага, віцэ-прэзыдэнта Парлямэнцкай асамблеі Рады Эўропы і дакладчыка сходу ў беларускіх пытаньнях Вольфганга Бэрэндта распаўсюдзіла па каналах мас-медыя ліст гэтага палітыка да Аляксандра Лукашэнкі. Гэта зусім ня першы ліст, які дасылаюць беларускаму лідэру эўрапейскія палітыкі. Напярэдадні група дэпутатаў Эўрапарлямэнту зьвярнулася да афіцыйнага Менску з патрабаваньнем правесьці незалежнае расьсьледаваньне справы зьніклых беларускіх палітыкаў. У сваім лісьце Вольфганг Бэрэндт выступае за вызваленьне арыштаванага беларускімі ўладамі парфесара Гомельскага медычнага інстытуту Юрыя Бандажэўскага, а таксама вызваліць палітычнага вязьня, дэпутата Вярхоўнага Савету Андрэя Клімава.
Расьсьледаваньне справы аб зьнікненьні Зьмітра Завадзкага, як вядома, часова прыпынена, а справы Юры Захаранкі, Віктара Ганчара й Анатоля Красоўскага не ўваходзяць у лік тых, якімі займаецца міліцыя, паведаміў учора на прэсавай канферэнцыі міністар унутраных справаў Уладзімер Навумаў. Навумаў згадаў, як на нядаўняй сустрэчы з Аляксандрам Лукашэнкам ён распавёў аб расьсьледаваньні крымінальных справаў, якія знаходзяцца пад пільным кантролем кіраўніка дзяржавы. “Сьпіс злачынстваў, якія стаяць на асаблівым кантролі прэзыдэнта адкрывае крадзеж у буйных памерах у Асіповіцкім раёне. Вінаватых у гэтым мы шукаем з 1994 году”, -- паведаміў міністар. А што да выкраданьняў вядомых апазыцыянэраў – Юрыя Захаранкі, Віктара Ганчара й Анатоля Красоўскага, – то такіх справаў у міліцэйскім сьпісе, якія кантралюе Лукашэнка, няма.
Кіраўнікі ўсіх партыяў, якія маюць свае прадстаўніцтвы ў парлямэнце Швэцыі, выступілі з адкрытым лістом, у якім заклікалі ўлады Беларусі зьмяніць візавую палітыку. “Без зразумелага тлумачэньня некалькім грамадзянам Швэцыі адмовілі ва ўезьдзе ў Беларусь. Некаторыя зь іх былі нават вымушаныя вяртацца з менскага аэрапорту, нягледзячы на тое, што іхныя візы былі ў парадку”, -- гаворыцца ў лісьце, які надрукавала 16 студзеня швэдзкае выданьне “Aftonbladet”.
Аляксандар Лукашэнка 16 студзеня падпісаў указ "Аб дадатковых мерах па рэгуляваньні эканамічных адносінаў". Указ, як адзначаецца ў дакумэнце, падпісаны "ў мэтах удасканальваньня дзяржаўнага рэгуляваньня эканамічных адносінаў, забесьпячэньня абароны інтарэсаў дзяржавы, а таксама правоў суб`ектаў прадпрымальніцкай дзейнасьці й рэалізацыі канстытуцыйных паўнамоцтваў Камітэту дзяржаўнага кантролю". Указам прадугледжана сыстэма штрафных санкцыяў у адносінах да суб`ектаў гаспадараньня. Органы Камітэту дзяржаўнага кантролю, згодна з указам, маюць права прымяняць санкцыі й накладаць штрафы, прадугледжаныя заканадаўствам для іншых кантралюючых органаў; накладаць ва ўстаноўленых заканадаўствам выпадках арышт на тавары (выручку, атрыманую ад рэалізацыі тавараў, выкананьня работ, аказаньня паслуг).
Былому генэральнаму дырэктару МТЗ Міхаілу Лявонаву сёньня павінны прад’явіць афіцыйнае абвінавачаньне. Пра гэта паведамілі БЕЛТА ў прэсавым цэнтры рэспубліканскай Пракуратуры. Лявонаў быў затрыманы 10 дзён таму па падазрэньні ў злоўжываньні службовым становішчам і нядбайнасьці.
Прэзыдэнт Расеі Пуцін на прэсавай канферэнцыі ў Варшаве пасьля сканчэньня першага раўнда перамоваў з польскім прэзыдэнтам Аляксандрам Квасьнеўскім нагадаў, што “расейска-польскую мяжу ў абодвух накірунках штогод перасякаюць мільёны людзей”. “Інтэрфакс” нагадвае ў гэтай сувязі, што расейска-польская мяжа ўяўляе сабой адсносна невялікі ўчастак у былой Прусіі (сёньняшняя паўднёвая мяжа Калінінградзкай вобласьці, дзе жывуць, і якую наведваюць зусім не мільёны людзей). Нягледзячы на такое відавочнае выкарыстаньне “саюзнае дзяржавы” Беларусі й Расеі ў мэтах павелічэньня расейска-польскай мяжы хаця б на словах, пра саму Беларусь – што знаходзіцца паміж Расеяй і Польшчай – Пуцін не казаў. Затое расейскі прэзыдэнт лічыць, што чаканае ўступленьне Польшчы ў ЭЗ ня створыць складанасьцей для разьвіцьця і паляпшэньня адносінаў гэтай краіны з Расеяй, і што Расея й Польшча выйшлі на новы ўзровень сваіх зносінаў. “Гэта ў нас не атрымалася”, -- сказаў У.Пуцін.
Камітэт дзяржкантролю Беларусі распачаў шырокамаштабную праверку прадпрыемстваў сыстэмы канцэрну “Белнафтахім” і Міністэрства аховы здароўя Беларусі. Пра гэта 16 студзеня паведаміў Аляксандру Лукашэнку старшыня КДК Анатоль Тозік. У Міністэрстве аховы здароўя, у прыватнасьці, вядзецца праверка эфектыўнасьці выкарыстаньня бюджэтных сродкаў і іншых дзяржаўных рэсурсаў.
Такое рашэньне гарвыканкаму было прынятае напярэдадні Новага году. У кожным з двух раёнаў гораду будзе скарачацца 27-35 чалавек. Пакуль ад ініцыятывы гарадзкіх уладаў пацерпяць каля 250 выхавацеляў падрыхтоўчых і першых клясаў, якія разьмяшчаюцца ў дзіцячых садках. У першыя працоўныя дні новага году загадчыкі дзіцячых садоў прапанавалі або тэрмінова напісаць заявы аб згодзе на скарачэньне акладаў на 15-25%, або рыхтавацца да звальненьня.
Супрацоўнікі спэцслужбаў Беларусі затрымалі шасьцёх грамадзянаў гэтай краіны, абвінавачаных у спробе прадаць абагачаны ўран. За 1,5 кг гэтага радыёактыўнага матэрыялу яны прасілі 150 тысячаў даляраў. Спроба продажу была спыненая ў выніку ўкараненьня супрацоўніка спэцслужбаў у групу гандляроў. Пасьля затрыманьня прадаўцоў урану высьвятлілася, што гэты метал быў выкрадзены з атамнай электрастанцыі, а ў Беларусі няма сваіх АЭС. Сьледчыя сьцьвярджаюць, што ўран мае расейскае, украінскае ці літоўскае паходжаньне, паведамляе "France-Presse".
, iнформэр
