Квасьнеўскі перадаў Пуціну зварот жонак рэпрэсаваных беларускіх палітыкаў :: Хартыя'97 :: Навiны

У пятніцу стала вядома, што зварот жонак рэпрэсаваных беларускіх апазыцыянэраў – Людмілы Карпенкі, Ірыны Красоўскай, Тацяны Клімавай, Вольгі Захаранкі, Сьвятланы Завадзкай і Зінаіды Ганчар – быў перададзены Ўладзімеру Пуціну. Падчас перамоваў у Варшаве прэзыдэнты Ўладзімер Пуцін і Аляксандар Квасьнеўскі, акрамя іншага, абмеркавалі й сытуацыю ў Беларусі. Пра гэта Аляксандр Квасьнеўскі ўпершыню заявіў у пятніцу польскаму радыё "Zet". Згодна інтэрвію, сытуацыю ў Беларусі прэзыдэнты Пуцін і Квасьнеўскі абмяркоўвалі ўжо ў першыя часы перамоваў.

Як паведамляе Радыё Свабода, падчас інтэрвію карэспандэнт радыё "Zet" запытала ў Аляксандра Квасьнеўскага, як ставіцца да беларускай апазыцыі расейскі прэзыдэнт.

“Ёсьць глыбокі занепакой. Напэўна, Беларусь застаецца істотным партнёрам, але я разумею, што Аляксандар Лукашэнка – партнёр надзвычай нялёгкі”, - адказаў Квасьнеўскі.

На пытаньне, ці лічыць Пуцін Лукашэнку дыктатарам, Аляксандар Квасьнеўскі адказаў: “Не, такія словы не ўжываюцца ў палітычнай размове. Затое, я дакладна лічу Лукашэнку чалавекам, зь якім нялёгка супрацоўнічаць. Але ліст жонак беларускіх апазыцыянэраў, якія зьніклі, якія загінулі, быў перададзены і спадзяюся, што, выкарыстоўваючы свае магчымасьці, прэзыдэнт Пуцін высьветліць гэтае пытаньне”.

Такім чынам, з адказаў прэзыдэнта Квасьнеўскага вынікае, што ніякага канкрэтнага сумеснага рашэньня ў справе звароту жонак рэпрэсаваных беларускіх палітыкаў кіраўнікі Расеі й Польшчы не прымалі. Аднак, напэўна, станоўчым бокам зьяўляецца тое, што гэтая справа абмяркоўвалася на такім высокім узроўні.