Міністэрства аховы здароўя ў стадыі абвастрэньня :: Хартыя'97 :: Навiны

Апарат Міністэрства аховы здароўя ліхаманіць ад кадравых перастановак. Літаральна праз месяц пасьля прызначэньня на пасаду міністра Ўладзіслаў Астапенка заявіў, што зьбіраецца абнавіць апарат міністэрства. І дадаў, што для гэтага ў яго ёсьць важкія прычыны: апошні час некаторыя чыноўнікі актыўна лябіравалі інтарэсы заходніх вытворцаў медычнай тэхнікі і добранька-та нагрэлі на гэтым рукі. Астапенка заявіў: першы крок зрабіў Лукашэнка, зараз справа за мной...

І тут у міністэрстве пачаліся дабраахвотна-прымусовыя звальненьні. Спачатку заяву “па ўласным жаданьні” напісала намесьнік міністра Ларыса Сакалоўская, пасьля галоўны санітарны доктар Беларусі Валеры Філонаў. І калі Валерыю Пятровічу, да слова, вельмі добраму спэцыялісту й чалавеку, адразу знайшлі замену, то кабінэт Сакалоўскай да гэтага часу пусты.

Праўда, у кулуарах міністэрства кажуць, што ў крэсла намесьніка міністра сядзе галоўны доктар Лепельскага тэрытарыяльна-медычнага аб’яднаньня Валеры Хаджаеў. Як жартуюць супрацоўнікі міністрэства, напэўна, для балянсу. У кіраўніцтве Міністэрства аховы здароўя ўжо ёсьць прадстаўнікі Берасьці й Гомлі. Чаму б не дадаць у апарат і віцебскіх медыкаў.

Праўда, пра Валерыя Хаджаева ў медычных колах ведаюць мала. Але гэта, як паказвае практыка, яшчэ ні пра што не кажа. Пра першага намесьніка міністра Людмілу Пастаялку да моманту ейнага прызначэньня таксама было вядома няшмат. Але ў Пастаялкі дачка – асабісты доктар Лукашэнкі. Яшчэ адзін намесьнік міністра й па сумяшчальніцтву галоўны санітарны доктар Беларусі Валеры Ключановіч падчас прэзыдэнцкіх выбараў ачольваў выбарчую камісію Гомельскай вобласьці. А гэтая вобласьць амаль адзінагалосна прагаласавала за Аляксандра Лукашэнку. У медычных колах не выключаюць, што кар’ерны рост Ключановіча зьвязаны менавіта з вынікамі галасаваньня.

Валеры Хаджаеў ніякіх выбарчых камісіяў не ўзначальваў, уплывовых сваякоў, паводле нашых дадзеных, ня мае. Але ўзначальваемае ім ТМА двойчы за апошнія некалькі гадоў было вызнана лепшым у краіне. Валеры Хаджаеў – чалавек актыўны, патрабавальны, малады. Асабіста знаёмы са страшынём камісіі па ахове здароўя, фізычнай культуры, справах моладзі й сям’і Палаты прадстаўнікоў Нацыянальнага сходу Валерыем Лектаравым, які, як вядома, доўгі час ачольваў упраўленьне аховы здароўя Віцебскага аблвыканкаму. Ня выключана, што ён і падтрымоўвае свайго земляка. Праўда, Валеры Хаджаеў клянецца, што ўпершыню чуе аб магчымых зьменах у сваім жыцьці, і кажа, што ён чалавек маленькі, “такіх у вярхі не бяруць..."

Але кадравыя жарсьці кіпяць ня толькі ў вярхах міністэрства. Без кіраўнікоў засталіся два ўпраўленьня Міністэрства аховы: па фармацыі й медычнай тэхніцы, а таксама па кадравай палітыцы, навуцы й навучальных установах. Былыя кіраўнікі гэтых структур Аляксандар Фёдараў і Алег Грабоўскі папрасіліся “па ўласным жаданьні” адразу пасьля заявы Ўладзіслава Астапенкі навесьці парадак у сваім ведамстве. У Міністэрстве аховы здароўя кажуць, што гэта толькі пачатак, на чарзе звальненьні яшчэ некалькіх кіраўнікоў упраўленьняў. Зараз усю структуру Міністэрства аховы здароўя правярае Камітэт дзяржкантролю. Як паказвае практыка, паўсюль, куды накіроўваюцца прэзыдэнцкія праверкі, знаходзяць крадзяжы, нядбайнасьць і злоўжываньне службовым становішчам.