Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Так называецца артыкул у нямецкай газэце “Suddeutsche Zeitung”, датычны тэмы беларуска-расейскай інтэграцыі. “Беларусь і Расея заклікаюць да саюзу. Аднак насамрэч ніхто гэтага ня хоча. Няроўны саюз Расеі, дзе жыве 150 мільёнаў, зь Беларусяй, дзе ўсяго 10 мільёнаў жыхароў, -- любімы праект аўтарытарна-эксцэнтрычнага Аляксандра Лукашэнкі”, – гаворыцца ў артыкуле.
“У сваёй дзейнасьці беларускі кіраўнік КНГ АБСЭ у Беларусі амбасадар Ганс-Георг Вік страціў давер ураду Беларусі”, - так пракамэнтаваў адмову ад выдачы беларускай уязной візы нямецкаму дыплямату прэсавы сакратар Міністэрства замежных справаў Павал Латушка на брыфінгу, што адбыўся ў МЗС 24 студзеня.
Крымінальныя справы адносна дырэктараў беларускіх прадпрыемстваў адмоўна сказваюцца на міжнародным іміджы краіны. Такую думку выказаў у сераду агенцтву “Интерфакс” прадстаўнік МЗС Беларусі, які пажадаў застацца неназваным. Паводле ягоных словаў, кіраўнікі беларускіх прадпрыемстваў асабіста курыруюць пастаўкі за мяжу. “Акрамя таго, частка збыту забясьпечваецца дзякуючы асабістым кантактам дырэктароў”, - падкрэсьліў суразмоўца. На ягоную думку, гэта справядліва адносна перш за ўсё, продажу тэхнікі ў Расею, краіны Сярэдняй Азіі й Блізкага Ўсходу. “Ужо на дадзены момант частка падрыхтаваных кантрактаў блізкія да зрыву”, - адзначыў прадстаўнік МЗС.
Дырэкцыя Бялыніцкага раённага Цэнтру творчасьці моладзі адмовіла радзе мясцовага краязнаўчага таварыства ў правядзеньні заняткаў Народнага ўнівэрсытэту ў памяшканьні Цэнтра. Сваю адмову адміністрацыя матывавала пунктам адпаведнага “палажэньня”, які забараняе ёй даваць памяшканьне для правядзеньня мерапрыемстваў такога кшталту грамадзкім арганізацыям. Усяго за паўтары месяцы лекцыі Народнага ўнівэрсытэту набылі папулярнасьць сярод мясцовых жыхароў: на іх прыходзілі ня толькі дарослыя, але й школьнікі старэйшых клясаў. Рада краязнаўчага таварыства, кіраўніцтва гарадзкой ячэйкі ТБМ, як арганізатары ў Бялынічах заняткаў Народнага ўнівэрсытэту, шукаюць памяшканьне, каб мець магчымасьць працягваць яго далейшую дзейнасьць.
Днямі генэральны дырэктар прамысловага аб’яднаньня “Азот” забараніў безнаяўнае пералічэньне прафсаюзных унёскаў. У выніку дырэктарскага загаду прафкам Незалежнага прафсаюзу, куды ўваходзяць 850 работнікаў “Азоту”, не атрымае каля 2 мільёнаў рублёў за студзень. У адказ на гэта Незалежны прафсаюз прадрыемства мае намер прад’явіць судовыя зыскі ад сябраў прафсаюзу супраць адміністрацыі. Пра гэта паведаміў старшыня прафкаму Сяргей Антусевіч. “Кожны сябра нашага прафсаюзу піша дзьве заявы: аб уступленьні ў прафсаюз і аб безнаяўным пералічэньні ўнёскаў, так што наша практыка не супярэчыць ніводнаму зь беларускіх законаў, -- кажа Сяргей Антусевіч.— Сёньня сябры нашага прафсаюзу падаюць заявы ў камісію па працоўных спрэчках на прадпрыемстве, а пасьля зыскі ў суд. А мы будзем распачынаць калектыўную працоўную спрэчку ў абласным гаспадарчым судзе”.
Самы буйны беларускі прафсаюз – работнікаў аўтамабільнага й сельскагаспадарчага машынабудаваньня – накіраваў Аляксандру Лукашэнку зварот з патрабаваньнем адмяніць пастанову ўраду ад 14 сьнежня 2001 году. Пастанова фактычна забараніла безнаяўны парадак уплаты прафсаюзных унёскаў.
У сьнежні 2001 г. сярэдні памер месяцовай пэнсіі склаў 65 тысячаў рублёў (76% ад велічыні мінімальнага спажывецкага бюджэту пэнсіянэра), паведамілі ў Міністэрстве статыстыкі й аналізу. Сярэдні памер пэнсіі па ўзросьце склаў 68,2 тысячаў рублёў, па інваліднасьці – 60,3 тысячаў рублёў. Рэальны памер прызначанай месяцовай пэнсіі (пэнсіі, скарэктаванай на індэкс спажывецкіх коштаў на тавары й паслугі) у сьнежні 2001 году ў параўнаньні зь лістападам 2001 году зьменшыўся на 5%.
Пад пагрозай закрыцьця аказаўся цэнтар мэдыка-сацыяльнай дапамогі Крычаўскага раённага таварыства Чырвога Крыжа. Камунальныя службы толькі за адзін месяц ацяпляльнага сэзону выставілі рахунак у 507000 рублёў, які цэнтар ня можа аплаціць. Зараз існуе дзьве магчымасьці: ці адключыць ацяпленьне, ці спыніць працу цэнтра па мэдыка-сацыяльнай дапамозе інвалідам, адзінокім і састарэлым людзям.
Нацыянальны банк Беларусі “прапанаваў” выдаткаваць прадпрыемствам аграрнага комплексу на вясновы сеў крэдыты агульным памерам 70 мільярдаў беларускіх рублёў, паведаміў у чацьвер старшыня Праўленьня Нацбанку Пётар Пракаповіч. Паводле ягоных словаў, гэта зроблена па просьбе Мінсельгасхарчу.
“У сувязі зь цяжкім эканамічным становішчам у народнай гаспадарцы пераход Магілёўскай вобласьці на экспэрымэнт, зьвязаны з самафінансаваньнем, не надае спадзяваньняў на лепшае”, - лічыць старшыня абласнога савету прафсаюзаў Анатоль Любчанка. Прычыны для такой заявы цалкам абгрунтаваныя. Паводле дадзеных аблстату, ніводзін з асноўных прагнозных паказчыкаў, заплянаваных для народнай гаспадаркі вобласьці, не выкананы. Адпаведна абставінам сур’ёзна абвастрылася праблема выплаты заробкаў. Так і ня здолелі на 31 сьнежня выплаціць грошы работнікам 255 суб’ектаў гаспадараньня, ільвіная доля якіх прыпадае на АПК вобласьці. Агульная сума запазычанасьці на канец году склала 1908,6 млн. рублёў, і зрабіла Магілёўскую вобласьць свайго роду лідэрам у рэспубліцы.
Па рашэньні Дзярждэпартамэнту ЗША ўведзеная новая анкета – заяўка для атрыманьня неіміграцыйнай візы на ўезд у ЗША, а таксама яшчэ адна дадатковая форма. Форма запаўняецца асобамі ва ўзросьце ад 16 да 46 гадоў і ўключае, у прыватнасьці, пытаньні аб навыках карыстаньня агнявой зброяй, выбуховымі рэчывамі, аб навыках працы зь ядзернымі, біялягічнымі й хімічнымі тэхналёгіямі, аб вайсковай службе, аб удзеле ў ваенных канфліктах. Пра гэта паведаміў на брыфінгу прэс-сакратар МЗС Беларусі Павал Латушка.
Законапраект Рэспублікі Беларусь аб папраўках і дапаўненьнях у Закон аб друку й СМІ на дадзены момант знаходзіцца на разглядзе беларускага парлямэнту. Дадзены законапраект павінен замяніць Закон аб прэсе і СМІ, прыняты ў 1995 годзе. Аднак, на думку аўтарытэтнай кампаніі ў абарону правоў чалавека АРЦІКЛЬ 19, законапраект утрымлівае вялікую колькасьць пунктаў, якія не адпавядаюць міжнародным стандартам свабоды слова й самавыказваньня. Такія пункты трэба зьмяніць або выключыць, лічыць АРЦІКЛЬ 19.
Пытаньне аб Беларусі не разглядаецца ў рамках дзейснай сэсіі ПАРЭ. Аднак Камітэт па адукацыі, культуры й СМІ Беларусі ПАСЭ плянуе абмеркаваць сытуацыю з мас-медыя ў Беларусі. На гэтыя слуханьні запрошаныя дзьве беларускія дэлегацыі – ад дзяржаўных СМІ на чале зь міністрам інфармацыі Міхаілам Падгайным і ад недзяржаўных на чале з прэзыдэнтам Беларускай асацыяцыі журналістаў (БАЖ) Жанай Ліцьвіной. Зімовая сэсія Палямэнцкай асамблеі Рады Эўропы (ПАРЭ) праходзіць у Стразбургу з 21 па 25 студзеня.
“Тройка” АБСЭ – міністры замежных справаў Румыніі, Партугаліі й Нідэрляндаў – абмяркоўвала ў Лісабоне надзённыя пытаньні, якія непакояць гэтую арганізацыю, у тым ліку апошнія падзеі ў Беларусі. Як паведаміў Радыё Свабода партугальскі дыплямат Луіша Кабаса, які ў адмысловай групе дзейснага старшыні АБСЭ адказвае за краіны Ўсходняй Эўропы, у тым ліку за Беларусь, праблемным беларускім пытаньнем стала сытуацыя з Кансультатыўна-назіральнай групай АБСЭ. “Таму што зараз мы насамрэч імкнемся прызначыць новага кіраўніка групы, і гэты працэс не варушыцца так хутка, як бы хацелася АБСЭ. Мы лічым, што гэта вельмі важная група й надаем вялікую значнасьць прысутнасьці АБСЭ ў Беларусі. І, безумоўна, прызначэньне новага кіраўніка КНГ АБСЭ – гэта адзін з прыярытэтаў у дзейнасьці АБСЭ”, -- паведаміў дыплямат.
Камісія па міжнародных справах і сувязях з СНД “палаты прадстаўнікоў” “ня бачыць неабходнасьці ў далейшай дзейнасьці ў рэспубліцы КНГ АБСЭ”. Як паведаміў “Интерфаксу” намесьнік галавы камісіі Сяргей Касьцян, такі пункт погляду быў выкладзены сябрамі камісіі падчас сустрэчы ў парлямэнце зь міністрам замежных справаў Беларусі Міхаілам Хвастовым.
МЗС Партугаліі занепакоены адмоваю беларускіх уладаў выдаць візу на ўезд былому старшыні КНГ АБСЭ ў Беларусі Гансу-Георгу Віку. Партугальскі дыплямат, які адказвае ў адмысловай дэлегацыі дзейснага старшыні АБСЭ за краіны Ўсходняй Эўропы Луіша Кабаса, заявіў, што “аб намерах беларускіх уладаў партугальскі МЗС даведаўся яшчэ ў панядзелак”. “Вядома, адмова ў візе зьяўляецца справаю беларускіх уладаў і спадара Віка асабіста, гэта ўжо не зьяўляецца справаю АБСЭ, бо візыт былога кіраўніка КНГ АБСЭ ніяк не зьвязаны з яго папярэдняй дзейнасьцю. Аднак адмова ў візе экс-кіраўніку КНГ АБСЭ – гэта, вядома, ня тое, што мы можам ухваляць апладысмэнтамі”, -- заявіў дыплямат.
Папраўкі, якія ўскладняць дзейнасьць беларускіх палітычных партыяў, плянуецца разглядзець на вясновай сэсіі “палаты прадстаўнікоў”. Зараз у Камісіі “палаты прадстаўнікоў” па правох чалавека знаходзіцца законапраэкт, які прадугледжвае закрыцьцё партыяў за адно парушэньне заканадаўства аб масавых мерапрыемствах, якія пацягнулі нанясеньне “істотнага ўрону” правам і законным інтарэсам грамадзян і арганізацыяў.
Главы ўрадаў Літвы, Польшчы й Расеі вырашылі правесьці сваю сустрэчу ў Калінінградзе ў першай палове сакавіка 2002 году. Пра гэта ў аўторак па тэлефоне дамовіліся прэм’ер-міністры Польшчы й Расеі -- Лешэк Мілер й Міхаіл Касьянаў, паведаміла прэсавая служба польскага габінэту міністраў.
Сталая камісія “палаты прадстаўнікоў” па правох чалавека, нацыянальных стасунках накіруе ў Канстытуцыйны суд Беларусі запыт аб законнасьці дзеяньняў кіраўнікоў прадпрыемстваў, якія адмаўляюцца пералічваць прафсаюзныя ўнёскі. Такое рашэньне прынята 23 студзеня на паседжаньні камісіі. Пастанова ўрада ад 14 сьнежня 2001 году аб некаторых мерах па абароне правоў сябраў прафсаюзаў адмяняе безнаяўны парадак уплаты прафсаюзных унёскаў.
Берасьцейскі межгарнізонны суд на выязным паседжаньні ў Баранавічах прызнаў ваенкома Ганцавіцкага раёну падпалкоўніка Васіля Арсеновіча віноўным па артыкуле 159 частцы 3 Крымінальнага кодэксу (“наўмыснае пакіданьне ў небясьпечнасьці, зьдзейсьненае асобай, якая сама па неасьцярожнасьці ці з ускосным наўмысьлем паставіла пацярпелага ў небясьпечны для жыцьця ці здароўя стан”).
Беларусь заняла другое месца сярод краін былога СССР па тэмпах росту афіцыйнага курсу даляра ЗША да нацыянальнай валюты ў 2001 годзе. Такі вынік аналізу дадзеных, атрыманых БелаПАН з цэнтральных банкаў гэтых дзяржаў. Лідэрам стаў Узбэкістан, дзе афіцыйны курс даляру вырас за год у 2,1 разы (з 325 да 688 сумоў).
Урад Беларусі занепакоены тым, што ў яго ня хопіць грошай на вясновую пасяўную кампанію пасьля рашэньня Нацыянальнага банка па зьмене грашова-крэдытнай палітыкі. Гэтае пытаньне абмяркоўваў віцэ-прэм’ер па сельскай гаспадарцы Аляксандар Папкоў з Аляксандрам Лукашэнкам. Мясцовыя трэйдэры й аналітыкі не выключаюць, што ў сакавіку Нацыянальнаму банку пад уціскам Савету Міністраў давядзецца рабіць эмісію. Хаця Лукашэнка, перш прыхільнік эмісійнага “ажыўленьня” эканомікі, на мінулым тыдні сказаў, што звышплянавай эмісіі сёлета ня будзе.
, iнформэр
