Беспрэцэдэнтная лаяльнасьць суда :: Хартыя'97 :: Навiны

Берасьцейскі межгарнізонны суд на выязным паседжаньні ў Баранавічах прызнаў ваенкома Ганцавіцкага раёну падпалкоўніка Васіля Арсеновіча віноўным па артыкуле 159 частцы 3 Крымінальнага кодэксу (“наўмыснае пакіданьне ў небясьпечнасьці, зьдзейсьненае асобай, якая сама па неасьцярожнасьці ці з ускосным наўмысьлем паставіла пацярпелага ў небясьпечны для жыцьця ці здароўя стан”).

Арсеновіч асуджаны на два гады з адтэрміноўкай выкананьня прысуду на год. 12 жніўня мінулага году а першай гадзіне ночы асабісты аўтамабіль Васіля Арсеновіча, дзе знаходзіліся два пасажыры, у тым ліку мэдычная сястра, зьбіў на дарозе ля вёскі Разьдзеловічы Ганцавіцкага раёну мясцовага жыхара, 30-гадовага Міхаіла Кісялевіча. Мэдычная дапамога пацярпеламу не аказвалася: ваенком не палічыў патрэбным давезьці пацярпелага да шпіталя, які знаходзіўся непадалёк ад месца здарэньня.

Кіроўца й пасажыры забралі пабіты бампер аўтамабілю й зьбеглі з месца здарэньня. Пасьля ДТЗ пацярпелы пражыў суткі і ад атрыманых ранаў памёр. Па заяве сваякоў загінулага была ўзбуджаная крымінальная справа. Хутка пасьля здарэньня Васіль Арсеновіч прыйшоў у міліцыю і прызнаўся. На судовым працэсе былі прадстаўленыя дакумэнты, якія сьведчылі аб тым, што загінулы знаходзіўся ў нецьвярозым стане. Рашэньне суда ўступіць у сілу праз дзесяць дзён.

Па зьвестках БелаПАН, сваякі загінулага маюць намер яго абскардзіць. Ваенком працягвае працаваць на мінулым мейсцы. У лістападзе 2001 году, калі ён ужо знаходзіўся пад сьледзтвам, Міністэрства абароны заключыла зь ім кантракт на наступныя пяць гадоў – пра гэта Арсеновіч паведаміў на судзе.