Беларускіх акадэмікаў хутка пачнуць звальняць :: Хартыя'97 :: Навiны

Беларускую акадэмію навук чакае скрачэньне кадраў. Як паведамляе карэспандэнт “Известий”, такія высновы незалежных экспэртаў. Падставаю для такога заключэньня стала нарада навуковай грамадзкасьці, што прайшла на днях у Нацыянальнай акадэміі навук пад кіраўніцтвам Аляксандра Лукашэнкі. Яна паказала, што заплянаваная рэарганізацыя навукі ў Беларусі ня будзе суправаджацца павелічэньнем асыгнаваньняў на яе.

Навука, па сутнасьці, атрымае тое самае фінансаваньне, што й летась, без уліку інфляцыі й росту мінімальнага заробку. Гэта азначае, што 30-35% пэрсаналу НАН павінны быць скарочаныя.

Так, на першы квартал гэтага году інстытутам акадэміі навук выдаткавана 17% ад агульнага гадавога аб’ёму фінансаваньня. Гэтых грошай хопіць толькі на выплату заробку за 1,5 месяцы. У выніку супрацоўнікаў інстытутаў НАН у масавым парадку пераводзяць на 0,5 і 0,7 акладу ў месяц. Магчымым выхадам з сытуацыі можа быць і масавае адпраўленьне ў адпачынак без захаваньня заробку.

Ва ўмовах надзвычай складанай сытуацыі ў эканоміцы разьлічваць на якія-небудзь значныя па аб’ёму гаспадарчыя дамовы, якія раней былі адным з буйных артыкулаў даходаў акадэмічных інстытутаў, не прыходзіцца. А між тым, кіраўніцтва краіны й акадэміі ставіць задачу павялічыць аб’ём гасдамоваў у два разы, што, на думку экспэртаў, нерэальна.