Беларусь закупае тульскую зброю :: Хартыя'97 :: Навiны

Афіцыйная беларуская дэлегацыя на чале з намесьнікам генэральнага дырэктара канцэрну “Белрэсурсы” Аляксандрам Патанцавым прыбыла ў Тулу 28 студзеня. Паводле інфармацыі тульскай адміністрацыі, сёньня, 29 студзеня, беларуская дэлегацыя сустрэлася з губэрнатарам Тульскай вобласьці Васілём Старадубцавым. На сустрэчы абмяркоўваліся пытаньні гандлёва-эканамічнага, ваенна-тэхнічнага двухбаковага супрацоўніцтва. У праграме візыту, які працягнецца да 31 студзеня, заплянаваныя наведваньне дэлегацыяй буйных тульскіх прадпрыемстваў ваенна-тэхнічнага комплексу – “Канструктарскага бюро прыборабудаваньня”, “Тульскага патроннага заводу”, ААТ “Туламашзавод”, шэрагу прадпрыемстваў сельгасмашынабудаваньня, аграрнага комплексу й лёгкай прамысловасьці.

Мэта візыту – падрыхтоўка пагадненьня аб двухбаковым супрацоўніцтве паміж Тульскай вобласьцю і Рэспублікай Беларусь. У складзе дэлегацыі – супрацоўнікі міністэрства замежных справаў, шэрагу міністэрстваў і ведамстваў, прамыслоўцы, прадпрымальнікі, прасдтаўнікі Ўзброеных сілаў.

Госьці наведаюць Тульскую гандлёва-прамысловую палату, дзе сустрэнуцца з дырэктарскім корпусам Тульскай вобласьці. Як падкрэсьлівае прэсавая служба тульскай абласной адміністрацыі, за апошнія два месяцы гэта ўжо другая сустрэча афіцыйных асоб Тульскай вобласьці й Беларусі. У сьнежні 2001 году прадстаўнічая тульская дэлегацыя на чале з губернатарам Васілём Старадубцавым пабывала ў Менску, дзе правяла перамовы з Аляксандрам Лукашэнкам. Па выніках 2001 году таваразварот паміж Тульскай вобласьцю і Беларусяй склаў 38 мільёнаў даляраў. Акрамя прадукцыі тульскага ВПК, тульскія прадпрыемствы пастаўляюць нам прадукцыю металюргіі, хіміі, электроніку, будаўнічыя матэрыялы. Зь Беларусі ў Тульскую вобласьць паступае сельгастэхніка, прадукцыя хімічнай прамысловасьці, тавары народнага спажываньня.