Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Мандат КНГ АБСЭ ў Беларусі неабходна перагледзіць, заявіў у інтэрвію Беларускаму радыё галава Міністэрства замежных справаў Міхал Хвастоў. “У рамках ранейшага мандату група ня ў стане дзенічаць. Палітычна і эканамічна сытуацыя ў нашай краіне зьмянілася ў лепшы бок, але АБСЭ не разумее, якія мэты сама арганізацыя перасьледуе ў Беларусі”, - адзначыў міністар.
Забастовачны камітэт аб’яднаньня “Беларуськалій” мае намер спыніць на пяць хвілінаў працу вытворчасьці, паведаміў “Интерфаксу” старшыня прафкаму аб’яднаньня, лідэр прафкаму работнікаў хімічнай прамысловасьці ФПБ Леанід Зайцаў. Падтрымаць акцыю пратэсту вырашыў прафсаюз работнікаў аграпрамысловага комплесу. Нагадаем, што ўчора Менскі абласны суд прызнаў незаконнай рэзалюцыю агульнагарадзкога мітынгу ад 11 студзеня ў Салігорску аб аб’яўленьні папераджальнай забастоўкі 1 лютага і рашэньне аб ейным правядзеньні ў ВА “Беларуськалій”. Суд палічыў за неабходнае неадкладнае выкананьне свайго рашэньня.
Вынікі працы адмысловай працоўнай групы па Беларусі Парлямэнцкай асамблеі АБСЭ, якая наведае Менск з 3 па 5 лютага, лягуць у аснову даклада Сталага камітэту ПА АБСЭ. Ягонае паседжаньне пройдзе ў Вене 21 лютага. У прэсавым рэлізе, распаўсюджаным Кансультатыўна-назіральнай групай АБСЭ ў Беларусі 31 студзеня, прыводзяцца словы кіраўніка адмысловай працоўнай групы па Беларусі Уты Цапф. “Місія працоўнай групы, -- паведаміла яна, -- заключаецца ў ацэнцы і абмеркаваньні прагрэсу ў галіне ўстаноўленых крытэраў: празрыстасьці выбарчага працэсу свабоды й прэсы, доступу апанентаў да дзяржаўных СМІ, адсутнасьці дыскрымінацыі адносна палітычных апанентаў і павелічэньні функцыяў і паўнамоцтваў парлямэнту”.
Кіраўніком Цэнтральнай выбарчай камісіі Беларусі паўторна абраная Лідзія Ярмошына. Такое рашэньне было прынятае на паседжаньні пазачарговай сэсіі “савету рэспублікі”, якая праходзіць у Менску. Глава адміністрацыі Ўрал Латыпаў адзначыў, што яна “з бляскам” правяла тры важнейшыя выбарчыя кампаніі: выбары ў мясцовыя Саветы, парлямэнцкія выбары й выбары прэзыдэнта. Ён характарызаваў старшыню ЦВК як чалавека “свабоднага ад зьнешніх уплываў” і адзначыў, што на яе “асабліва падчас апошняй выбарчай кампаніі аказваўся ўціск” і з боку міжнародных структур, і сродкаў масавай інфармацыі, і апазыцыйных сілаў. Нагадаем, што так “блестяще” падрыхтаваныя Ярмошынай парлямэнцкія й прэзыдэнцкія выбары былі прызнаныя міжнароднай супольнасьцю несвабоднымі й недэмакратычнымі.
“А што тут пісаць? У нас вялікія праблемы, і мы знаходзімся ў найцяжкім фінансавым становішчы”, -- нэрвова адказаў на просьбу аб інтэрвію гендырэктар беларускага Гандлёвага дому ў Маскве “БеларусьИнтерТоргРесурсы” Леў Багатыроў. Пасьля некалькіх хвілінаў тэлефоннай размовы ён усё ж такі пагадзіўся на сустрэчу і папярэдзіў, што станоўчага матэрыялу не атрымаецца.
Міністэрства гандлю Беларусі ўвяло новы парадак імпарту піва на тэрыторыю рэспублікі. Як паведамілі ў прэсавай службе Саюзу расейскіх півавараў, у адпаведнасьці з гэтым парадкам беларускі імпарцёр абазаны ўнесьці заклад у памеры кошту ўвезенага зь півам посуду, які могуць вярнуць толькі пры ўмове вывазу з рэспублікі ўсёй тары. Пра гэта паведамляецца ў лісьце, накіраваным намесьнікам кіраўніка Дэпартамэнту нетарыфнага рэгуляваньня Мінэканомразьвіцьця РФ на імя кіраўніка Выканаўчага сакратарыяту Саюзу В.Мамантава.
Тры асноўныя прагнозныя паказчыкі сацыяльна-эканамічнага разьвіцьця Магілёўскай вобласьці – аб’ём вытворчасьці прамысловых тавараў, тавараў народнага спажываньня і сельгаспрадукцыі – у 2001 годзе засталіся не выкананымі. Пра гэта, у прыватнасьці, было заяўлена 30 студзеня на паседжаньні Магілёўскага аблвыканкаму. У 2001 годзе аб’ём прамысловай вытворчасьці ў галіне павялічыўся ў параўнаньні з 2000 годам на 3,5 адсоткі пры прагнозе 4,2.
На Віцебскім вытворчым аб’яднаньні “Віцязь” насьпявае канфлікт паміж прафсаюзнай арганізацыяй і адміністрацыяй прадпрыемства. Паводле словаў намесьніка старшыні прафкаму аб’яднаньня Тацяны Паграбешынай, “абвастрэньне традыцыйных спрэчак паміж прафсаюзам і адміністрацыяй заводу зьвязана з чарговым загадам кіраўніцтва прадпрыемства “Аб унясеньні дапаўненьняў у Правілы ўнутранага працоўнага распарадку”.
Сёньня стала вядома пра першыя ахвяры ўрагану, які пранёсься па Беларусі ў пачатку тыдня. Як паведамілі карэспандэнту “Союз-инфо” ў МЧС РБ, жыхар аднаго з райцэнтраў Менскай вобласьці памёр у сераду ў тэрытарыяльным мэдычным аб’яднаньні. Ён быў дастаўлены туды ў аўторак са шматлікімі траўмамі, пасьля таго, як у выніку моцнага ветру на яго ўпала цагляная кладка.
Кіраўніцтва Першага музычнага тэлеканалу, што вядзе ў Беларусі вяшчаньне на частаце закрытага расейскага каналу ТВ-6, мае намер распачаць судовую справу з прэсавым цэнтрам грамадзкай ініцыятывы “Хартыя’97”. Прычына – распаўсюд апошняй інфармацыі, якая, на думку кіраўніцтва каналу, абражае гонар, годнасьць і дзелавую рэпутацыю прадпрыемства. Пра гэта 30 студзеня на прэсавай канферэнцыі ў Менску паведаміў журналістам дырэктар музычнага каналу Віталь Чыжоў, перадае БелаПАН.
Менскі абласны суд пад старшынствам Генадзя Комеля прызнаў незаконнай рэзалюцыю агульнагарадзкога мітынгу ад 11 студзеня ў Салігорску аб аб’яўленьні папераджальнай забастоўкі 1 лютага й рашэньне аб ейным правядзеньні ў ВА “Беларуськалій”. Суд палічыў за неабходнае неадкладнае выкананьне свайго рашэньня. Беларускі Гэльсынскі камітэт лічыць рашэньне суда незаконным. Як заяўляе БГК, рэзалюцыя мітынгу не зьяўляецца прававым актам і ня можа быць прадметам судовага разгляду.
У судзе Ленінскага раёну Менску пачаўся прагляд відэёматэрыялаў па справе Аляксандра Чыгіра (сына былога прэм’ер-міністра Беларусі Міхаіла Чыгіра), Антона Яшына й Зьмітра Юцкевіча. Падсудныя абвінавачваюцца ў крадзяжы аўтамабіляў, зьдзейсьненым арганізаванай групоўкаю (арт.205 ч.4 КК РБ). У выпадку прызнаньня іхнай віны даказанай, абвінавачаныя могуць быць пазбаўленыя свабоды на тэрмін ад 7 да 15 гадоў з канфіскацыяй маёмасьці.
Рашэньнем Шклоўскага раённага суда (Магілёўская вобласьць) адміністратыўнаму пакараньню ў выглядзе штафу падвергнуты рэдактар недзяржаўнай газэты “Шклоўскія навіны” Аляксандар Шчарбак. Журналіста прызналі віноўным у парушэньні заканадаўства аб друку.
Акцыю пратэсту з патрабаваньнем своечасовай выплаты заробку правялі 30 студзеня работнікі розных падразьдзелаў Магілёўскага будаўнічага трэсту №12. Каля 30 будаўнікоў прыйшлі ў аблвыканкам. Яны патрабавалі сустрэчы з кіраўніцтвам вобласьці, каб распавесьці аб сваіх праблемах.
Аляксандар Лукашэнка сваім загадам даў адтэрміноўку на прымяненьне фінансавых санкцыяў да кампаній, у якіх былі выяўленыя парушэньні пры праверцы фінансава-кантрольнымі органамі іх эканамічнай дзейнасьці. Указам вызначана, што калі за 30 дзён пасьля складаньня акту рэвізіі прадпрыемства ліквідуе выяўленыя недахопы і праінфармуе аб гэтым кантрольны орган, то яно будзе вызвалена ад фінансавых санкцыяў. У іншым выпадку санкцыі будуць прымяняцца ў поўным аб’ёме. Указ быў апублікаваны ў сераду ў газэце “Советская Белоруссия” і ўвайшоў у сілу з моманту публікацыі.
Нямецкі парлямэнтар Ута Цапф прыедзе ў Менск 3 лютага на чале з дэлегацыяй адмысловай працоўнай групы па Беларусі Парлямэнцкай асамблеі АБСЭ. Пра гэта 30 студзеня заявіў выконваючы абавязкі кіраўніка КНГ АБСЭ ў Беларусі Мішэль Рывалье. Акрамя спадарыні Цапф, Менск наведаюць парлямэнтары са Швэцыі Урбан Алін, які раней неаднаразова бываў у Беларусі, а таксама новы член працоўнай групы Гэлена Дземакава з Латвіі. Магчыма, да іх далучыцца яшчэ адзін наваабраны член працоўнай групы - спадар Райс з Партугаліі. Праграма знаходжаньня дэлегацыі ПА АБСЭ зараз удакладняецца.
Журналісты, якія асьвятлялі працу Каардынацыйнай рады генэральных пракурораў краін-сябраў Садружнасьці Незалежных Дзяржаваў, са зьдзіўленьнем заўважылі, што кіраўнікі пракуратураў 11 краінаў СНД не прынялі за два дні працы ў Менску, дзе адбывалася паседжаньне, ніводнага прапанаванага дакумэнту.
У Беларусі ў траўні гэтага году пачне вяшчаньне другі нацыянальны канал тэлевізіі. У адрозьненьні ад першага, дзяржаўнага, у другім дзяржаве будзе належыць 51 адсотак - астатняе атрымаюць акцыянэры. Да гэтага часу ў Беларусі працуе адзіны тэлевізійны канал, сетка вяшчаньня якога пакрывае ўсю краіну. На гэтай падставе Захад кажа пра манапалізацыю электронных СМІ ўрадам.
Чампіён Беларусі “Белшына” мае вялікія фінансавыя праблемы. Правал беларусаў на Кубку Садружнасьці стаў толькі першай ластаўкай, і сытуацыя па-ранейшаму імкліва пагаршаецца. Пакінуў каманду варатар Валеры Шанталосаў, які атрымаў запрашэньне другога беларускага клюбу – “Тарпеда—МАЗ” (Менск) – і ўжо правёў некалькі трэніровак у складзе гэтай каманды. Таксама зьехалі зь “Белшыны” асноўныя ігракі клюбу Сяднёў, Вострыкаў і Ланько. Ня хоча заставацца ў клюбе пры такой сытуацыі і трэнерскі штаб: газэта “Прессбол” паведаміла, што заявы аб сыходзе падалі галоўны трэнер Вячаслаў Акшаеў, ягоны асыстэнт Ігар Гасюта і начальнік каманды Ігар Старавойтаў.
Будучаму пэнсіянэру Аляксандру Лукашэнку ад зноў выпечанага пэнсіянэра. Аляксандар Рыгоравіч! 21 студзеня мне паведамілі ў аддзеле сацыяльнага забесьпячэньня г.Жабінка, што мая пэнсія будзе складаць 63 тысячы рублёў у месяц. Гэтая сума мяне зьдзівіла й насьмяшыла. І я нават не засмуціўся. З гэтых грошай я павінен аплаціць камунальныя паслугі, тэлефон, электрычнасьць і газ. Гэта ня менш за 13 тысячаў рублёў. У выніку застанецца на харчаваньне 50 тысячаў рублёў.
, iнформэр
