Беларусі давядзецца фінансаваць Сакратарыят Каарданацыйнай рады генпракурораў СНД :: Хартыя'97 :: Навiны

Журналісты, якія асьвятлялі працу Каардынацыйнай рады генэральных пракурораў краін-сябраў Садружнасьці Незалежных Дзяржаваў, са зьдзіўленьнем заўважылі, што кіраўнікі пракуратураў 11 краінаў СНД не прынялі за два дні працы ў Менску, дзе адбывалася паседжаньне, ніводнага прапанаванага дакумэнту.

Нагадаем, што прадстаўнікі пракуратур краінаў СНД павінны былі зацьвердзіць палажэньне аб каардынацыі намаганьняў у супрацьдзеяньні асабліва небясьпечным злачынствам: тэрарызму, незаконнаму гандлю зброяй, наркотыкамі, бандытызму. На паседжаньні ў Менску меркавалася таксама прыняць рашэньне аб стварэньні Навукова-мэтадычнага цэнтру, які займаўся б дасьледаваньнем актуальных прававых праблемаў, распрацоўкай прапановаў па ўніфікацыі нацыянальных заканадаўстваў у барацьбе са злачыннасьцю. Аднак удзельнікі паседжаньня так і не прыйшлі да агульнага меркаваньня ні па адным з пытаньняў, што стаялі на павестцы дня. Адзінае, з чым пагадзіліся ўсе, -- неабходна стварыць сакратарыят Кааардынацыйнай рады генэральных пракурораў краін-сябраў Садружнасьці Незалежных Дзяржаваў у складзе 6 чалавек і разьмесьціць яго ў Менску. Хаця раней плянавалася, што ён будзе працаваць у Маскве. Генпракуроры краін СНД станоўча вырашылі толькі пытаньне аб часовым фінансаваньні новай структуры. Мясцовыя наглядальнікі ў сувязі з гэтым адзначаюць, што надалей выдаткі на ўтрыманьне сакратарыяту Каардынацыйнай рады давядзецца ўзяць на сябе Беларусі.