Магілёўскія будаўнікі правялі акцыю пратэсту з патрабаваньнем выплаты заробку :: Хартыя'97 :: Навiны

Акцыю пратэсту з патрабаваньнем своечасовай выплаты заробку правялі 30 студзеня работнікі розных падразьдзелаў Магілёўскага будаўнічага трэсту №12. Каля 30 будаўнікоў прыйшлі ў аблвыканкам. Яны патрабавалі сустрэчы з кіраўніцтвам вобласьці, каб распавесьці аб сваіх праблемах.

Паводле словаў лідэра Свабоднага прафсаюзу будтрэсту Аляксея Паўлоўскага, будаўнікі яшчэ не атрымалі заробку за працу ў сьнежні мінулага году. Пры гэтым сярэднемесячны заробак у трэсьце – 50-60 тысячаў рублёў. У канцы мінулага году будаўнікі ўжо сустракаліся з кіраўніцтвам гарвыканкаму па праблеме несвоечасовай выплаты заробку й атрымалі абяцаньне, што грошы будуць выдавацца цалкам і ў тэрмін. Аднак гэтае абяцаньне не было выкананым. Не дапамаглі, са словаў Паўлоўскага, і звароты са скаргай на адміністрацыю трэсту ў праваахоўчыя органы.

Праз 20 хвілін пасьля пачатку акцыі да будаўнікоў выйшаў намесьнік старшыні аблвыканкаму Міхаіл Красноў, які курыруе праблемы будаўніцтва. Ён адзначыў, што прыярытэт пры выплаце заробку надаецца бюджэтным арганізацыям. Тым не менш, паводле словаў Краснова, у бліжэйшыя два-тры дні будаўнікам будуць пералічвацца грошы за выкананую на аб’ектах працу.