На судзе па справе Чыгіра праглядаліся відэяматэрыялы :: Хартыя'97 :: Навiны

У судзе Ленінскага раёну Менску пачаўся прагляд відэёматэрыялаў па справе Аляксандра Чыгіра (сына былога прэм’ер-міністра Беларусі Міхаіла Чыгіра), Антона Яшына й Зьмітра Юцкевіча. Падсудныя абвінавачваюцца ў крадзяжы аўтамабіляў, зьдзейсьненым арганізаванай групоўкаю (арт.205 ч.4 КК РБ). У выпадку прызнаньня іхнай віны даказанай, абвінавачаныя могуць быць пазбаўленыя свабоды на тэрмін ад 7 да 15 гадоў з канфіскацыяй маёмасьці.

Першымі праглядаліся відэёматэрыялы вобшуку двух гаражоў Аляксандра Чыгіра ў вёсцы Тарасава, пад Менскам, дзе ён заховаў аўтамабільныя дэталі, прызначаныя для камэрцыйнай дзейнасьці. Здымкі былі зробленыя падчас вобшуку 11 лютага 2001 году – на наступны дзень пасьля затрыманьня Чыгіра.

На думку ягонай маці Юліі Чыгір, якая была дапушчаная судом да абароны сына, прагледжаныя матэрыялы дазваляюць сьцьвярджаць, што гаражы былі ўзламаныя да 11 лютага, хаця ў пратаколе вобшуку гаворыцца, што сьледчыя адчынілі гараж менавіта вечарам 11 лютага. Юлія Чыгір лічыць, што сьледчыя не адзначылі ў пратаколе, што дзьверы гаража былі адчыненыя невядомымі яшчэ да вобшуку.

У сваіх тлумачэньнях Аляксандар Чыгір адзначаў, што месцазнаходжаньне аўтадэталяў, зафіксаванае на відэёстужцы, не ва ўсім супадае з парадкам, які быў заведзены ім. Акрамя таго, паводле ягоных словаў, на стужцы зафіксаваныя невядомыя яму дэталі.

Наступнае паседжаньне суда адбудзецца 11 лютага.