Зінаіда Ганчар абвінавачвае Ўладзімера Пуціна ў хаўрусьніцтве з рэжымам Лукашэнкі :: Хартыя'97 :: Навiны

Зінаіда Ганчар, жонка выкрадзенага 16 верасьня 1999 году вядомага беларускага палітыка Віктара Ганчара, зноў зьвярнулася з адкрытым лістом да прэзыдэнта Расеі Ўладзімера Пуціна. Як з жалем адзначаецца ў лісьце, на папярэдні зварот да расейскага лідэра -- 26 лістапада – яна ніякага адказу не атрымала. Зьвяртаючыся да прэзыдэнта Расеі, Зінаіда Ганчар піша: “Вы ня можаце ня ведаць, якія злачынствы вырабляюцца на тэрыторыі Рэспублікі Беларусь, але ў той самы час вы працягваеце маўчаць, і дэманструеце падтрымку рэжыму Лукашэнкі. Вядомыя расейскія палітыкі стала праводзяць гучныя кампаніі з крытыкай улады прыбалтыйскіх краін, нібыта за ўціск, якія яны аказваюць на грамадзян Расеі, што пражываюць на іхных тэрыторыях. Яны гэта тлумачаць клопатам аб лёсах суайчыньнікаў. Я таксама руская, я і мой сын нарадзіліся ў Расеі, мая маці – грамадзянка Расейскай Фэдэрацыі. Так чаму лёс маёй сям’і не хвалюе расейскую палітычную эліту? Бо маўчальніцтва расейскіх палітыкаў беларускія ўлады ўспрымаюць як ухвалу на новыя злачынствы”.

Зінаіда Ганчар нагадвае, што ейны муж быў адным з асноўных палітыкаў Беларусі, пра што ня можа ня ведаць Пуцін. На момант выкраданьня ён выконваў абавязкі старшыні Вярхоўнага Савету Рэспублікі Беларусь 13-скліканьня. Да гэтага ён займаў пасаду віцэ-прэм’ера беларускага ўраду, быў адным з кіраўнікоў Эканамічнага суда СНД, ачольваў Цэнтральную выбарчую камісію Беларусі, па даручэньні парлямэнту ачольваў адмысловую камісію, якая праводзіла прававую ацэнку парушэньняў Канстытуцыі й законаў Рэспублікі Беларусь, дапушчаных Лукашэнкам.

“Прайшло ўжо два з паловаю гады з часу выкраданьня Віктара Ганчара, але да гэтага ні я, ні грамадзкасьць нічога ня ведаем аб ягоным лёсе, -- гаворыцца ў лісьце. — Афіцынае сьледзтва бязьдзейнічае і маўчыць. Да і ці можа быць інакш, калі Лукашэнка прызначыў генэральным пракурорам Віктара Шэймана, імя якога часьцей за астатнія згадваецца ў матэрыялах, якія праліваюць сьвятло на зьнікненьні людзей, а сапраўднасьць гэтых дакумэнтаў не адмаўляецца кіраўнікамі праваахоўчых органаў”.

Зьвяртаючыся да Ўладзімера Пуціна, Зінаіда Ганчар просіць яго выкарыстоўваць увесь свой уплыў і магчымасьці для таго, каб падштрухнуць праваахоўчыя органы Беларусі да раскрыцьця злачынства, зьвязанага з выкраданьнем ейнага мужа, і пакараньня віноўных, якія б высокія дзяржаўныя пасады яны не займалі.