Кіраўнік дэлегацыі ПА АБСЭ адмаўляецца сустракацца з прадстаўнікамі беларускіх моладзевых арганізацыяў :: Хартыя'97 :: Навiны

У сувязі з візытам у Беларусь дэлегацыі адмысловай працоўнай групы Парлямэнцкай асамблеі АБСЭ па Беларусі з просьбай наладзіць сустрэчу з кіраўніком дэлегацыі сп. Утай Цапф. Прадстаўнікі руху мелі намер распавесьці пра рэпрэсіі адносна актывістаў ЗУБРа й беларускай моладзі ў агуле. Праваабарончая служба ЗУБРа зафіксавала больш за шэсьцьсот выпадкаў рэпрэсіяў адносна актывістаў руху. За 2001 год актывісты ЗУБРа падвяргаліся арыштам, штрафам, зьбіцьцю, выключэньням з унівэрсытэтаў, звальненьням з месца працы, вярбоўцы з боку КДБ.

За дзень да прыезду сп.Цапф супрацоўнікі Кансультатыўна-назіральнае групы АБСЭ ў Беларусі заявілі, што такая сустрэча немагчымая з прычыны шчыльнага графіка візыту, хаця просьба ЗУБРа была накіраваная, як толькі стала вядома, што візыт адбудзецца.

Рух ЗУБР выказвае сваё абурэньне тым, што сп.Цапф мае дастаткова часу для сустрэчы з дэпутатамі нелегітымнай “палаты прадстаўнікоў”, нейкай “рэспубліканскай каардынацыйнай радай”, і ня мае часу для тых, хто непасрэдна падвяргаецца рэпрэсіям і не па чутках знаёмы з мэтадамі дыктатарскага рэжыму.

Рух ЗУБР заяўляе, што адмаўленьне ад сустрэчы з актывістамі руху, якія зьведалі на сабе рэпрэсіі, не дазволіць скласьці аб’ектыўнае меркаваньне аб рэальнай сытуацыі ў Беларусі, і выказвае апасеньне, што рэжым можа скарыстаць гэтую адмову для ўзмацненьня ўціску на моладзь.