Ліцэнзаваньне прывядзе да закрыцьця незалежных дасьледчыцкіх цэнтраў :: Хартыя'97 :: Навiны

Увядзеньне ліцэнзаваньня сацыяльных дасьледаваньняў прывядзе да закрыцьця незалежных дасьледчыцкіх цэнтраў у Беларусі. Пра гэта ў інтэрвію БелаПАН заявіў кіраўнік Незалежнага інстытуту сацыяльна-эканамічных і палітычных дасьледаваньняў Алег Манаеў. Аб намерах увесьці ліцэнзаваньне сацыяльных дасьледаваньняў у Беларусі паведамляецца ў лісьце, накіраваным з Адміністрацыі прэзыдэнта ў навукова-дасьледчыцкія арганізацыі краіны – Беларускі дзяржаўны ўнівэрсітэт, Інстытут сацыялёгіі Нацыянальнай акадэміі навук Беларусі, беларускае таварыскае аб’яднаньне “Сацыялягічнае таварыства”.

Як лічыць Манаеў, закрыцьцё цэнтраў адбудзецца, у першую чаргу, з-за спыненьня фінансаваньня незалежных дасьледаваньняў.

Паводле словаў кіраўніка НІСЭПД, зараз усе незалежныя аналітычныя цэнтры фінансуюцца з двух крыніц: гэта прыватны бізнэс і міжнародныя гранты. Існуе, паводле ягоных словаў, жорсткая сыстэма справаздачнасьці за выкарыстаньне сродкаў, якія трапляюць у арганізацыі, што ажыцьцяўляюць фінансаваньне праэкту. “Незразумела, якія адносіны да гэтага маюць органы ўлады”, -- сказаў Манаеў. Пры гэтым ён адзначыў, што калі міжнародныя структуры, магчыма, і пагодзяцца з тым, што справаздачы аб выкарыстаньні сродкаў і вынікі дасьледаваньняў будуць трапляць і ў органы ўлады, то прыватныя заказчыкі ніколі ня пойдуць на гэта. “Людзі плоцяць вялікія грошы за правядзеньне эканамічнага маніторынгу, каб выкарыстоўваць гэтую інфармацыю ў канкурэнтнай барацьбе.Чаму гэтая інфармацыя павінна адкрывацца?” – сказаў Манаеў.

Увядзеньне ліцэнзаваньня сацыялягічных дасьледаваньняў, на ягоную думку, зьяўляецца адказам уладаў на актыўнасьць незалежных цэнтраў падчас мінулай выбарчай кампаніі. “Я мяркую, што ўлада, у рэшце рэшт, вырашыла пакласьці гэтаму канец”,— сказаў Манаеў.