Бацька Андрэя Зайцава мае намер дабіцца ўзбуджэньня крымінальнай справы праз суд :: Хартыя'97 :: Навiны

Юры Зайцаў, бацька актывіста гомельскага аддзелу незарэгістраванага моладзёвага руху супраціву ЗУБР Андрэя Зайцава, які скончыў жыцьцё самагубствам пад уціскам КДБ, мае намер у судовым парадку дабіцца ўзбуджэньня крымінальнай справы па факце гібелі сына. Юры Зайцаў падаў скаргу ў суд Савецкага раёну Гомлі на пастанову пракурора гэтага раёну аб адмове распачынаньня крымінальнай справы.

На думку Зайцава, адмова распачынаць крымінальную справу не аргумэнтаваная і ня можа быць аргумэнтаванай у прынцыпе, па той прычыне, што пракуратура не праверыла большую частку абставінаў, зьвязаных з трагічным учынкам Андрэя. Бацька, у прыватнасьці, спасылаецца на тое, што пракуратура не апытала шэраг сьведкаў. Апошнія маглі б пацьвердзіць, што Андрэй паведаміў ім аб фактах ягонага перасьледу чалавекам, які прадстаўляўся супрацоўнікам Упраўленьня КДБ па Гомельскай вобласьці.

Акрамя таго, Юры Зайцаў лічыць, што сьледзтва не ацаніла належным чынам заяву ягонага сына ў Беларускі Гэльсынскі камітэт. У гэтай заяве малады чалавек паведамляў аб тым, што яго вербавалі ў асьведамляльнікі, а таксама аб існаваньні аўдыёзапісу адной тэлефоннай размовы зь вярбоўшчыкам, пры якой, дарэчы, прысутнічалі сябры Андрэя.

Бацька 24-гадовага Андрэя Зайцава, які скончыў жыцьцё самагубствам, упэўнены, што існуе дастатковая колькасьць сьведчаньняў, якія дазваляюць высьветліць асобу супрацоўніка КДБ, што схіляў ягонага сына да супрацоўніцтва й накіраваць матэрыялы для распачынаньня крымінальнае справы.