Суд адмаўляецца разглядаць скаргу Юры Зайцава на дзеяньні пракуратуры :: Хартыя'97 :: Навiны

Суд Савецкага раёну Гомлі адхіліў скаргу бацькі загінулага актывіста ЗУБРа Андрэя Зайцава на дзеяньні пракуратуры. Бацька Андрэя Зайцава зьвярнуўся ў суд з прычыны адмаўленьня пракуратуры Савецкага раёну распачаць крымінальную справу й дасьледаваць усе абставіны сьмерці сына, якога вербаваў КДБ.

У скарзе Юры Зайцаў засьведчыў, што сьледчы пракратуры не прыняў на ўвагу існаваньня аўдыёстужкі з запісам тэлефоннае размовы сына з супрацоўнікам УКДБ, а таксама перадсьмяротную заяву Андрэя ў Беларускі Гэльсынскі камітэт. Не былі дапытанымі й сьведкі. У прыватнасьці, не дапыталі Віктара Карнеенку, які адкрыта заяўляў, што валодае інфармацыяй аб абставінах вярбоўкі Зайцава спэцслужбамі.

У матэрыялах таксама скажоныя сьведчаньні аб стане псыхічнага здароўя Андрэя. І галоўнае – не правераная належным чынам асоба супрацоўніка УКДБ Ястрэмскага, які, на думку бацькі Зайцава, пад імем Алеся Еўсьцігнеева займаўся вярбоўкай ягонага сына.

Усе згаданыя аргумэнты Юры Зайцава судзьдзя Аляксандар Мохамед на ўвагу не прыняў і вярнуў скаргу без разгляду на той падставе, што справа нібыта непадведамственная суду.

У Юры Зайцава й ягонага адваката Зьмітра Іванішкі ёсьць магчымасьць зьвярнуцца яшчэ ў абласную пракуратуру, каб яна правяла ўсебаковае расьследаваньне прычынаў сьмерці Андрэя Зайцава. Праўда, юрыдычна абгрунтаваць пытаньне ня проста. Пракурор Савецкага раёну Падсекін не дазваляе адвакату Зайцава пазнаёміцца з матэрыяламі ўжо завершанага сьледзтва.