Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Нарада па праблемах разьвіцьця банкаўскага сэктару, якую Аляксндар Лукашэнка правёў у мінулую пятніцу, не адрозьнівалася вялікай інфармацыйнай насычанасьцю. Прэзыдэнт, як і заўсёды, агітаваў банкіраў быць сумленным і весьці сьціплае жыцьцё. Пры гэтым ён абяцаў, што дзяржава ня будзе забіраць у камэрцыйных банкаў усе грошы. Бадай, галоўнай навіною нарады стала заява кіраўніка Сьледчага камітэту Леаніда Глухоўскага пра магчымае распачынаньне крымінальнае справы супраць былога прэзыдэнта "Белпрамбудбанку" Мікалая Ракава. Верагодна, гэтая навіна павінна адыграць ролю дадатковага стымулу ў справе прыцягненьня крэдытаў на пасяўную кампанію.
Распачалася крымінальная справа супраць ААТ “Белснабсервис”. Як паведамілі карэспандэнту БЕЛТА ў Дэпартамэнце фінансавых расьследаваньняў Камітэту дзяржаўнага кантролю Беларусі, гэтае таварыства нібыта прадставіла ў філію ААТ “Белаграпрамбанк” наўмысна ілжывую справаздачу прыбыткаў і стратаў за першую палову 2000 году і атрымала крэдыт у 20 мільёнаў рублёў.
300 работнікаў прафсаюзу аўтамабільнага й сельскагаспадарчага машынабудаваньня падаюць у Цэнтральны суд зыск да Аляксандра Лукашэнкі аб абароне ганару й годнасьці. Пра гэтае рашэньне прэзыдыюму АСМ судзіцца з кіраўніком Беларусі паведаміў старшыня прафсаюзу Аляксандар Бухвостаў.
Да пытаньня аб магчымасьці пралетарскай рэвалюцыі ў Беларусі. Фэдэрацыя прафсаюзаў Беларуская прыняла рашэньне аб правядзеньні 5 сакавіка агульнанацыянальнай акцыі пратэсту пад эканамічнымі лёзунгамі і з патрабаваньнем адмяніць вядомую ўрадавую пастанову, якая забараніла безнаяўнае пералічэньне прафсаюзных унёскаў, разьлічвае на 100 000 удзельнікаў у краіне і 50 000 у сталіцы. Аднак самі прафлідэры з улікам досьведу мінулых акцыяў, большасьць зь якіх прайшла незаўважанымі грамадзкасьцю з-за іхнай маламаштабнасьці, выказваюць занепакоенасьць: прыдуць - ня прыдуць. І, хутчэй за ўсё ня прыдуць.
Адразу пасьля прэзыдэнцкіх выбараў на беларускія прафсаюзы пачаўся наймацнейшы прэсінг. Фэдэрацыя прафсаюзаў Беларуская была ня ў стане супрацьдзейнічаць уладам. Варта прызнаць, што ФПБ была не гатовая да жорсткага й доўгага супрацьстаяньня з Чырвоным домам. Рашэньне аб адмене цэнтралізаванага адлічэньня прафсаюзных унёскаў з заробку й пагроза нацыяналізацыі ўласнасьці ФПБ паставілі прафсаюзы ў вельмі складанае становішча. Сваё бачаньне беларускага пытаньня ў інтэрвію газэце “День” прадстаўляе галоўны спэцыяліст дэпартамэнту працоўных Міжнароднай арганізацыі працы Франка Хофер.
Напрыканцы мінулага тыдня, з пачаткам перадвыбарчай кампаніі, на тэлевізіі падрыхтоўка да парлямэнцкіх выбараў уступіла ў самую гарачую фазу. 31 сакавіка 50 мільёнаў грамадзян краіны будуць абіраць дэпутатаў Вярхоўнай рады – парлямэнту.
У хуткім часе адбудзецца візыт у Беларусь дэлегацыі Саюзу правых сілаў Расеі. Падчас візыту, паведамляе Радыё Рацыя, паміж СПС і Аб’яднанай грамадзянскай партыяй будзе падпісанае пагадненьне аб супрацоўніцтве, а таксама агучана стратэгія правых сілаў у стасунках з нашай краінай. Пастанова атрымала назоў “Правы погляд”. Аб гэтым дамовіліся ў Маскве падчас міжнароднай канфэрэнцыі “Ўлада прэсы й прэс улады” Анатоль Лябедзька й Барыс Нямцоў.
Да 15 сакавіка шэсьць буйнейшых нафтахімічных прадпрыемстваў Беларусі зьменяць форму ўласнасьці і стануць адкрытымі акцыянэрнымі таварыствамі, паведаміла “Белорусской газете” крыніца ў канцэрне “Белнафтахім”. Згодна ўнутранаму загаду па канцэрну, уся ўласнасьць на першым этапе прыватызацыі застанецца ў руках дзяржавы. Першымі стануць на шлях прыватызацыі рэспубліканскія ўнітарныя прадпрыемствы “Азот” (Гародня), “Нафтан” і “Палімір” (Новаполацак), “Белшына” (Бабруйск) і два аб’яднаньня “Хімвалакно” (Магілёў і Сьветлагорск). Заводы гэтыя арыентаваныя на экспарт й прыцягальныя для замежных інвэстараў. У агуле гэта палова ўсяго прамысловага патэнцыялу й фінанасавага патоку канцэрну “Белнафтахім”.
Пагаршэньне фінансавага становішча вялікай колькасьці беларускіх прадпрыемстваў зьявілася галоўнай прычынай таго, што плян па падатку на прыбытак быў выкананы летась меней чым на 80%. Пра гэта заявіў міністар па падатках і зборах Беларусі Канстанцін Сумар у сваім выступе на паседжаньні калегіі свайго ведамства. Паводле словаў міністра, прыбытак ад рэалізацыі прадукцыі ў супаставімых коштах ў 2001 годзе скараціўся на 27,2%, рэнтабельнасьць зьменшылася з 13,5% да 8,9%, а колькасьць стратных прадпрыемстваў павялічылася з 21,1 да 35%.
Тэмпы росту прамысловай вытворчасьці на прадпрыемствах сталіцы ў студзені гэтага году склалі роўна 100 адсоткаў. Ні на адну дзесятую не ўдалося павялічыць асноўныя прагнозныя паказчыкі. Аб гэтым праінфармаваў калег на аператыўнай нарадзе ў сталічнай мэрыі 11 лютага першы намесьнік старшыні Менгарвыканкаму Мікалай Ярохаў.
Улады Менску прынялі рашэньне прыбраць з магістраляў і з цэнтру гораду гандлёвыя шапікі. Да 15 сакавіка пункты дробнага гандлю павінны быць унесеныя ва ўнутрыквартальныя тэрыторыі. Зараз менчукам давядзецца губляць час па крамах ці ехаць на ўскрайкі, каб набыць неабходныя дробязі.
Амэрыканскі ўладальнік тэлефоннай кампаніі "Belcel" мае намер прадаць сваю долю арабскай кампаніі "Saudi Oger Ltd", паведамляе “Белорусская газета”. У хуткім часе ў Менску адбудуцца перамовы цяперашніх акцыянэраў. Тэрміны правядзеньня сустрэчы й кошт кантракту не агучваюцца.
Чатыры гады таму, 11 лютага 1998 году, дэпутата Вярхоўнага Савету 13-га скліканьня Андрэя Клімава схапілі разам з жонкай на шляху да працы. Без санкцыі пракурора. Людзі ў штацкім гвалтоўна запіхалі іх у “варанок”. Хаця да гэтага цягам году Андрэй рэгулярна зьяўляўся да сьледчага на допыты, і нічога не замінала стражам парадку правесьці затрыманьне на мейсцы. Але ўладзе патрэбна была акцыя застрашэньня, дэманстрацыя сілы...
Апоўдні 11 лютага, у чацьвёртую гадавіну арышту вядомага прадпрымальніка й дэпутата Вярхоўнага Савету 13-га скліканьня Андрэя Клімава, актывісты Аб’яднанай грамадзянскай партыі стануць “ланцугом неабыякавых людзей” ля калёніі па вуліцы Кальварыйскай у Менску, дзе Клімаў адбывае пакараньне. Нагадаем, што ён быў асуджаны судом Ленінскага раёну сталіцы да шасьці гадоў пазбаўленьня свабоды ў калёніі ўзмоцненага рэжыму за крадзеж у асабліва буйным памеры й службовым падмане падчас будаўніцтва дому па вуліцы Лодачнай у Менску. Сваёй віны Андрэй Клімаў не прызнаў, абарона настойвала на адсутнасьці ў ягоных дзеяньнях складу злачынства, а міжнародныя й беларускія праваабарончыя арганізацыі заявілі аб палітычнай матывацыі прысуду.
Памочнік Дзяржсакратара ЗША па пытаньнях дэмакратыі, правоў чалавека й працы Лорн Крэйнэр сустрэлася 7 лютага з дэлегатамі ад незалежных беларускіх СМІ Мікалаем Маркевічам, Іосіфам Сярэдзічам, Андрэем Бастунцом і Вячаславам Хадасоўскім. Спн. Крэйнэр заявіла аб падтрымцы Злучанымі Штатамі ўсіх тых, хто адстойвае прынцыпы свабоды слова й правоў чалавека на Беларусі. Афіцыйны прадстаўнік Дзяржаўнага дэпартамэнту ЗША зьвярнулася з заклікам да ўраду Аляксандра Лукашэнкі забясьпечыць фундамэнтальныя правы й свабоду ў краіне. Прадстаўнік Дзярждэпартамэнту ЗША выказала крайнюю занепакоенасьць палітыкай Аляксандра Лукашэнкі адносна перасьледу й застрашэньню незалежных СМІ, а таксама крымінальным перасьледам Іосіфа Сярэдзіча й Мікалая Маркевіча. Дзярждэпартамэнт ЗША ў чарговы раз заклікаў рэжым разьвеяць атмасфэру страху, паважаць правы чалавека й неадкладна даць справаздачу аб зьніклых апазыцыянэрах, уключна з аператарам ГРТ Зьмітром Завадзкім.
На закрытым працэсе па справе групы былога афіцэра спэцпадразьдзелу МУС Беларусі “Алмаз” Валеры Ігнатовіча завяршылася судовае следзтва. Як стала вядома БелаПАН з інфармаваных крыніцаў, суд разгледзіў шэраг хадайніцтваў. Напрыклад, адзін з прадстаўнікоў пацярпелага боку заявіў хадайніцтва аб выкліку для допыту ў суд панятых, якія прысутнічалі пры канфіскацыі кнігі выдачы і прыёму зброі й боепрыпасаў асабістаму складу Менскага сьледчага ізалятара №1.
Беларускі Гэльсынскі камітэт зьвярнуўся да начальніка калёніі УЖ 15/1 Івана Бахуры, дзе адбывае пакараньне дэпутат Вярхоўнага Савету Беларусі 13-га скліканьня Андрэй Клімаў, з просьбай прадставіць у суд матэрыялы аб магчымым прымяненьні да вязьня ўмоўна-датэрміновага вызваленьня ад пакараньня.
На Менскім трактарным заводзе пачалося масавае скарачэньне работнікаў. Адміністрацыя тлумачыць гэта эканоміяй фінансавых рэсурсаў. Адміністрацыя заводу, як паведаміў Радыё Свабода намесьнік генэральнага дырэктара Мікалай Стукач, выдала загад аб скарачэньні працоўнага калектыву на 10%. “Гэта прыкладна 1900 чалавек, якія працуюць на Менскім трактарным заводзе. У першую чаргу будуць скарачаццца вакансіі. У другую чаргу скарачэньне закране тых, хто мае хаця б невялікую сацыяльную абарону. Напрыклад, ёсьць такая сацыяльная катэгорыя, як пэнсіянэры, якія працягваюць працаваць. А далей пройдуць скарачэньні, як кажуць, па жывому”, - паведаміў Мікалай Стукач. У працоўным калектыве МТЗ зараз пануе разгубленасьць і трывожнае чаканьне.
Паводле дадзеных Міністэрства статыстыкі й аналізу, пазыкі па заробку на 31 студзеня павялічыліся да 33 млрд. рублёў, што складае 6,8 % да фонду заробкаў. Абсалютна ўся запазычанасьць прыпадае на апошні месяц па справаздачах. Каля 56 адсоткаў, як і перш, прыпадае на прадпрыемствы Мінсельгасхарчу. На прамысловых прадпрыемствах яна склала 10,9 млрд. ці 30 % ад усёй запазычанасьці.
, iнформэр
