Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Аляксандар Лукашэнка на паседжаньні Савету Міністраў заявіў: “Передайте Боллоеву (Таймураз Балоеў займае пасаду прэзыдэнта піваваранай кампаніі "Балтыка", Пецярбург), если еще раз по НТВ или другим жульническим СМИ увижу заказные материалы, то "Балтики" здесь не будет, как и любых других российских фирм. Если российские бизнесмены хотят участвовать в либерализации и приватизации предприятий, то пускай это делают по-белорусски. Шантаж в Беларуси не пройдет", паведамляе "Интерфакс".
Як паведамілі карэспандэнту БЕЛТА ў беларускім МЗСе, сёлета будзе актывізаванае палітычнае ўзаемадзеяньне Беларусі й Ірану. Чакаецца, што ў 2002 годзе Міхаіл Хвастоў наведае Ісламскую Рэспубліку Іран па запрашэньні свайго іранскага калегі, адбудзецца абмен візытамі па лініі міжпарлямэнцкага супрацоўніцтва. У пэрспэктыве прапрацоўваецца візыт у Беларусь прэзыдэнта Ісламскай Рэспублікі Іран Мохамада Хатамі.
Нанесены ўрон дзяржаве стаў прычынай для ўзбуджэньня крымінальнай справы да старшыні Берасьцейскага гарвыканкаму начальніка упраўленьня капітальнага будаўніцтва Мікалая Назарука. Як паведамілі карэспандэнту БЕЛТА ў прэсавай службе УУС аблвыканкаму, праваахоўчыя органы высьвятлілі, што як службовая асоба ў пэрыяд з 1997 па 2000-ы гады, Мікалай Назарук наўмысна не запатрабаваў ад ААТ “Блік” уплату грашовых сродкаў на разьвіцьцё інжынэрнай інфраструктуры гораду ў памеры 20 адсоткаў каштарыснага кошту нежылых памяшканьняў, пабудаваных гэтым грамадзтвам у жылых дамах па вуліцах Энгельса й Халтурына. Гэтым ён нанёс урон дзяржаве ў памеры звыш 80 тысячаў амэрыканскіх даляраў.
Трошкі больш за год таму ў Віцебскай выхаваўчай калёніі №1 адбыўся бунт. Напярэдадні нараджэньня Хрыстова, больш дакладна, з 5 на 6 студзеня 2001 году, шосты атрад вывелі на пляц. Начальнік атраду скамандаваў: “Крокам – руш! Песьню запявай!” Цяжка сказаць, як чаканілі крок арыштанты, напэўна, няроўна. Бо яны не салдаты. Але песьню падхапілі разам, хорам. Па-армейску. Праўда, куплеты песьні, складзеныя невядомым аўтарам, начальству не спадабаліся. У шматгалосным хоры адчуваўся заклік да непадпарадкаваньня. Натоўп, падобны на чорную хмару перад бурай, ірвануў у памяшканьне, дзе дняваў і начаваў. Забарыкадзіраваліся. На ўгаворы спыніць бунт хлопцы рэагавалі –па-свойму: да начальства калёніі даверу няма. Перамовы - толькі са сталічнымі ўладамі.
Вядомы беларускі мастак Аляксей Марачкін пакрытыкаваў пазыцыю Беларускага камітэту міру, які, як ён заявіў, без папярэдняга грамадзкага абмеркаваньня ўкараняе сваю канцэпцыю мэмарыялу ў Курапатах у структуры вышэйшай улады. Паводле ягоных словаў, ініцыятыва БКМ уяўляе сабой своеасабліву спробу апярэдзіць падзеі й надаць уладным структурам магчымасьць вырашыць праблему мэмарыялізацыі ўрочышча без грамадзкага абмеркаваньня. Калі казаць аб асноўных пунктах працоўнага праекту канцэпцыі мэмарыялу Курапаты, які рыхтуе другая грамадзкая інцыятыва – “За ўратаваньне мэмарыялу Курапаты”, мастак адзначыў, што неабходна выключыць з дакумэнту паняцьце “гісторыка-культурная каштоўнасьць”, якое суадносіцца са статусам будучага мэмарыялу. “Атрымоўваецца, што забойцы й тэрарысты, супрацоўнікі НКУС памножылі на тэрыторыі Беларусі гісторыка-культурныя помнікі. Я лічу, што Курапаты павінны набыць асаблівы статус Нацыянальнага мэмарыялу-нэкропалю ахвяраў таталітарызму”, -- падкрэсьліў Марачкін.
Упершыню за апошнія паўгады кіраўніцтва “Газпраму” заявіла аб магчымым і вельмі істотным зьніжэньні даходаў газавай галіны: намесьнік старшыні праўленьня гэтай кампаніі Аляксандар Разанаў заявіў днямі журналістам, што “чысты прыбытак газавікоў сёлета будзе скарачацца на траціну – да 73 млрд. рублёў”. Згодна сьцвярджэньню Разанава, гэта зьвязана амаль выключна “з рашэньнем Расеі зьнізіць газавыя расцэнкі для саюзнай Беларусі – з 30 да 10 даляраў за тысячу кубамэтраў з 1 красавіка”, паведамляе GazetaSNG.ru.
Юрузанскі машынабудаўнічы завод (ЮМЗ, марка лядоўняў “Юрюзань”) і беларускі “Атлянт” плянуюць стварыць на базе ЮМЗ сумеснае прадпрыемства па выпуску лядоўняў, паведаміў “Интерфаксу” прэзыдэнт асацыяцыі прадпрыемстваў і банкаў Чалябінскай вобласьці “ПромАсс” Віктар Шэрубле (уладальнік 71% акцыяў машзаводу). Выпуск лядоўняў у рамках новага СП плянуецца пачаць у кастрычніку 2002 году. Сёньня прадпрыемства выпускае прывадныя ланцугі для сельгасмашын і зьбіраецца аднавіць выпуск патронаў для стралковай зброі. Дзяржаве належыць 21% акцыяў Юрузанскага машзаводу. У “Атлянце” дзяржава валодае блякіруючым пакетам.
У 2001 годзе беларускія прадпрыемствы па вытворчасьці мінеральных угнаеньняў паймелі вялізны ўрон. Страты ад паставак угнаеньняў на ўнутраны рынак па дэкляраваных коштах склалі каля 38 мільярдаў рублёў; “Азоту” – 12 мільярдаў рублёў; "Беларуськалія" - 25 мільярдаў рублёў, астатняя сума – гэта страты Гомельскага хімічнага заводу. Паводле БелаПАН, пра гэта гаварылася на паседжаньні рады дырэктараў канцэрну “Белнафтахім” на мінулым тыдні. Такім чынам, кіраўніцтва канцэрну ўскосна пацьвердзіла зьяву, якую старанна хаваюць чыноўнікі: адбываецца схаваная датацыя сельскай гаспадаркі за кошт стратаў вытворцаў. І хаця ў гэтым выпадку размова йдзе аб угнаеньнях, неабходна таксама ўлічваць нафтапрадукты, тэхніку і шмат чаго іншага, што накіроўваецца ў калгасы й саўгасы ў доўг, які не вяртаюць.
Складанай застаецца сытуацыя ў сельскай гаспадарцы Берасьцейскай вобласьці. Паводле дадзеных Берасьцейскага абласнога ўпраўленьня статыстыкі, у студзені вытворчасьць мяса на сельгаспрадпрыемствах зьнізілася на 17 адсоткаў, ці на 2,1 тысячы тонаў. Спалі сярэднесуткавыя прывесы буйной жывёлы. На 14,1 тысячы зьменшылася пагалоўе буйной жывёлы, на 1,6 тысячы – пагалоўе кароў, на 4,4 тысячы – сьвіней. На 19 адсоткаў павялічыўся падзеж сьвіней. Менш, чым у студзені мінулага году, закуплена жывёлаў і птушкі ў насельніцтва.
Сёньня ў судовай палаце №3 Міжнароднага трыбуналу для былой Югаславіі пад старшынствам судзьдзі Рычарда Мея пачнецца судовы працэс над экс-прэзыдэнтам СРЮ Слабаданам Мілошавічам. Упершыню на лаве падсудных у МТБЮ будзе сядзець былы кіраўнік дзяржавы. Галоўны пакурор трыбуналу Карла дэль Понтэ ўпэўнена, што прыцягненьне да адказнасьці вышэйшых кіраўнікоў, вінаватых у ваенных злачынствах, у прыватнасьці, Мілошавіча, дазволіць прадухіліць злачынствы ў будучым і зробіць унёсак ва ўмацаваньне міру.
Пасьля перапынку ў два тыдні ў Кастрычніцкім судзе Менску аднавіўся працэс па справе сына экс-прэм’ера Міхаіла Чыгіра Аляксандра. Суд пачаў вывучаць выдэёматэрыялы сьледзтва, на якіх зьнятыя вобшукі ў гаражох, дзе Чыгір-малодшы нібыта захоўваў запчасткі скрадзеных аўтамабіляў. Абарона Аляксандра Чыгіра зьвярнула ўвагу суда на тое, што некаторыя замкі гэтых гаражоў выглядаюць пашкоджанымі – таму ня выключаецца, што напярэдадні вобшукаў скрадзеныя запчасткі Аляксандру Чыгіру падкінулі. Абвінавачваньне не пагаджаецца з гэтымі падазрэньнямі й настойвае на віноўнасьці сына экс-прэм’ера. Удзельнікі працэсу ня выключаюць, што ўжо на гэтым тыдні могуць пачацца судовыя спрэчкі.
Пракуратура накіравала для разгляду ў Цэнтральны раённы суд Менску крымінальную справу супрацоўнікаў міліцыі гэтага раёну Марата Новіка й Юры Труса. Міліцыянтаў абвінавачваюць у катаваньнях людзей падчас допытаў. Аналягічныя справы супраць міліцыянтаў знаходзяцца ў Фрунзенскім, Маскоўскім, Заводзкім і Ленінскіх судох Менску. Практыка сьведчыць, што разгляд справаў, у якіх фігуруюць супрацоўнікі праваахоўчых органаў, займае больш часу ў параўнаньні з іншымі крымінальнымі справамі.
Менгарвыканкам не задаволіў просьбу Маладога Фронту правесьці 14 лютага на плошчы Якуба Коласа па праспэкце Францыска Скарыны шэсьця. Аднак, са словаў лідэра МФ Паўла Севярынца, акцыя ўсё адно адбудзецца незалежна ад таго, якой будзе пазыцыя мэра Паўлава ці Аляксандра Лукашэнкі. У Менску шэсьце пачнецца ў Дзень Сьвятога Валянціна а 17.00 з плошчы Якуба Коласа па праспэкце Скарыны.
У 2001 годзе ў Беларусі да сьмяротнай меры пакараньня былі асуджаныя 7 чалавек. Яшчэ 11 чалавек асуджаныя да пажыцьцёвага заключэньня. Пра гэта 11 лютага на сустрэчы з журналістамі ў Менску паведаміў старшыня Вярхоўнага суда краіны Валянцін Сукала. Зараз, па ягоных словах, чакаюць прысуду 5 чалавек, якія асуджаныя да выключнай меры пакараньня. Як адзначыў Сукала, пакараньне сьмерцю прымяняецца ў Беларусі за падвойнае - ці з большай колькасьцю ахавяраў – забойства, і колькасьць такіх прысудаў паступова зьмяншаецца. Так, тры гады таму да пакараньня на сьмерць былі асуджаныя 13 асобаў.
У Беларусі й Лібіі склаліся добрыя палітычныя ўзаемаадносіны, якія, аднак, пакуль не пацьвярджаюцца эканамічным супрацоўніцтвам. Такое меркаваньне выказаў старшыня “палаты прадстаўнікоў” Вадзім Папоў 11 лютага падчас сустрэчы з часовым даверанным у справах бюро Вялікай Сацыялістычнай Народнай Лібійскай Арабскай Джамахірыі Абдулом Мухамэдам Альмаграві. Паволе словаў Папова, зараз эканамічныя стасункі паміж дзьвюма краінамі знаходзяцца ў “замарожаным стане”. Аднак, як лічыць ён, зьмяніць сытуацыю да лепшага здолее нядаўна створаная беларуска-лібійская міжурадавая камісія па гандлёва-эканамічным супрацоўніцтве.
“Балтыка” запатрабавала ад беларускіх партнёраў вярнуць 10,5 мільёнаў даляраў, укладзеных канцэрнам у рэканструкцыю менскага піўзаводу “Крыніца”. На такія меры “Балтыка” вымушана была пайсьці з-за таго, што Савет Міністраў Беларусі да гэтага часу не прыняў рашэньня перадаць расейскай кампаніі кантрольны пакет “Крыніцы”.
Пастановаю Міністэрства эканомікі Беларусі з 8 лютага на 25 адсоткаў павялічаныя тарыфы на электраэнэргію для насельніцтва. Зараз 1 кілават-гадзіна для гарадзкога насельніцтва, якое жыве ў дамох з газавымі плітамі, каштуе 24 рублі (раней – 19,2). Столькі сама каштуе электраэнэргія, якая адпускаецца лякарным установам Міністэрства аховы здароўя, таварыствам па садаводзтву і гаражна-будаўнічым кааператывам, на асьвятленьне лесьвічных клетак і двароў, на працу ліфтаў. Кошт электраэнэргіі для сельскага насельніцтва й насельніцтва гарадоў, якія жывуць у дамох з электрычнымі плітамі, павышаецца з 13,9 да 17,4 рублёў.
У студзені ў Беларусі зафіксаваны самы высокі за апошнія 16 месяцаў узровень інфляцыі. Паводле дадзеных Міністэрства статыстыкі й аналізу, спажывецкія кошты вырасьлі на 6,1 адсоткі. Больш высокі паказчык быў зафіксаваны ў верасьні 2000 году – 6,8 адсоткі. У сьнежні 2001 году спажывецкія кошты ўзрасьлі на 5,5 адсоткі, у студзені 2001 году – на 4,8 адсоткі. Паводле разлікаў ураду, сёлета рост спажывецкіх коштаў павінен быў скласьці ад 20 да 27 адсоткаў. Такім чынам, чвэрць “дыстанцыі” пройдзеная за адзін месяц.
У Віцебскай вобласьці ўлады забаранілі падлеткам да 16 гадоў знаходзіцца ў грамадзкіх месцах без нагляду бацькоў з 21.00 да 6.00 у час навучальнага году і з 23.00 да 6.00 у час вакацыяў. За парушэньне гэтай нормы прадугледжаная адміністратыўная адказнасьць у выглядзе папярэджаньня ці штрафу ў памеры да трох мінімальных заробкаў. Функцыі карацельнага органу ўскладзеныя на камісіі па справах непаўнагадовых.
, iнформэр
