БГК падрыхтаваў даклад “Правы чалавека ў Беларусі” :: Хартыя'97 :: Навiны

У Менску адбылася прэзэнтацыя дакладу Беларускага Гэльсынкскага камітэту “Правы чалавека ў Беларусі”. Нагадаем, што Беларусь ратыфікавала міжнародны пакт аб грамадзянскіх і палітычных правох, які ўступіў у сілу 23 сакавіка 1976 году. Згодна гэтаму дакумэнту, усе дзяржавы, якія прызналі пакт ці далучыліся да яго, абавязаныя прадстаўляць пэрыядычныя даклады аб прынятых імі мерах па пераўтварэньні ў жыцьцё правоў, замацаваных у пакце, і аб праграсе, дасягнутым у выкарыстаньні гэтых правоў.

Згодна паведамленьню БГК, з моманту публікацыі рэспублікай 4-га дакладу аб выкананьні пакту ў краіне адбыліся некаторыя пазытыўныя зьмены. Аднак у агуле сытуацыя з правамі чалавека не зьмянілася. “У парушэньне прынцыпу вяршынства закону на месцах асноўнымі зьяўляюцца падзаконныя, ведамственныя акты, часовыя дэкрэты прэзыдэнта, а не Канстытуцыя й законы, прынятыя на ейнай аснове, -- гаворыцца, у прыватнасьці, у дакладзе БГК. – Існуе практыка ўхіленьня рэгіянальных адміністрацыяў ад рашэньня праблемаў на месцах. Многія грамадзяне не знаходзяць задавальненьня сваіх законных патрабаваньняў у судзе, які па-ранейшаму застаецца залежным ад выканаўчай улады. Парушаецца роўнасьць грамадзян перад законам. Адзначаецца рост карупцыі, злачыннасьці ў сярэдніх і вышэйшых эшалонах улады”.

Акрамя таго, дыялёг грамадзкасьці з уладай ня стаў шырокім. Часта прадстаўнікі ўлады сабатуюць цывілізаванае рашэньне крызысных праблемаў. БГК таксама канстатуе, што да дзяржаўных СМІ – радыё, цэнтральнага й мясцовых каналаў ТВ, газэтаў – выключна рэдка дапускаюцца лідэры апазыцыйных сілаў і грамадзянскай супольнасьці. “Часта крытычныя выступы мантажуюцца, заўвагі перакручваюцца”, -- падкрэсьліваецца ў дакладзе.

Аўтары дакладу -- вядомыя беларускія праваабаронцы – спадязюццца, што падрыхтаваны імі на канкрэтных прыкладах аналіз сытуацыі з правамі чалавека ў рэспубліцы дапаможа сусьветнай супольнасьці лепш зразумець, што адбываецца ў Беларусі.