Рэдактар “Пагоні” абвінавачвае КДБ у фальсыфікацыі крымінальнай справы :: Хартыя'97 :: Навiны

Галоўны рэдактар гарадзенскай газэты “Пагоня” Мікола Маркевіч быў выкліканы ў пракуратуру для знаёмства з матэрыяламі крымінальнай справы аб паклёпе на прэзыдэнта. “Пасьля пяці гадзінаў грунтоўнага знаёмства з двума агромністымі тамамі справы, я магу сказаць: справы няма! Ёсьць дзікае жаданьне пасадзіць журналістаў, але за што – гэта абсалютна адсутнічае ў матар’ялах справы, - заявіў Маркевіч у інтэрвію Радыё Свабода. - Па-першае, знайшла пацьверджаньне інфармацыя пра сьлед КДБ у нашай справе. Справа пачынаецца з таго, што начальнік ўпраўленьня КДБ па Гарадзенскай вобласьці палкоўнік Свораб зьвярнуўся да пракурора вобласьці Васіля Ліцьвінава з просьбай даць прававую ацэнку матар’ялам, надрукаваным у № 36 газэты ад 5 верасьня. І зварот датаваны 5 верасьня. Але на той момант газэта не была яшчэ надрукаваная – і гэта бачна з матэрыялаў справы. У дадатак высьветлілася, што крамольны нумар, аказваецца. ніхто не чытаў акрамя Паўла Мажэйкі – самога аўтара артыкулу».

«І самае галоўнае, - дадаў галоўны рэдактар ”Пагоні”. - Асноўнае, на што спасылаюцца сьледчыя – гэта тое, што нумар быў распаўсюджаны ў Інтэрнэце. Сёньня я ўпершыню пабачыў тыя раздрукоўкі “крамольнага” нумару, якія прадставіў сьледчаму гарадзенскі УКГБ. І раптам я ўбачыў, што гэта не раздрукоўка з Інтэрнэту, а раздрукоўка з нашага канфіскаванага кампутара. Фактычна гэта можна ахарактарызаваць, як вялікую фальшыўку КГБ”.