Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Прадстаўнікі Дзярждэпартамэнту ЗША прыбылі ў Менск 11:08, 20/02/2002
Дэлегацыя Дзяждэпартамэнту на чале з намесьнікам памочніка Дзяржаўнага сакратара ЗША Стывенам Пайфэрам прыбыла зь візытам у Менск. Спадар Пайфэр – галоўная афіцыйная асоба Дзярждэпартамэнту, адказная за статункі ЗША зь Беларусяй, Малдовай, Расеяй, Украінай. Як паведаміў прадстаўнік амбасады ЗША Аляксей Саламаха, мэта гэтага візыту – “ацэнка сытуацыі ў Беларусі ў сьвятле крытэраў, якія датычаць ўсіх краін – сябраў у галіне празрыстага выбарчага працэсу, свабоды слова, істотных функцыяў парлямэнту й свабоднага ад рэпрэсіяў палітычнага клімату”. Больш за тое, Стывен Пайфэр “будзе абмяркоўваць пытаньні продажу зброі й вайсковай падрыхтоўкі прадстаўнікоў дзяржаваў і групаў, арганізацыяў, якія выклікаюць занепакоенасьць”.
Стывен Пайфэр сустрэнецца зь беларускімі афіцыйнымі асобамі, прадстаўнікамі апазыцыйных партыяў, прафсаюзаў, недзяржаўных арганізацыяў і незалежных СМІ, з жонкамі зьніклых палітыкаў.
Візыт будзе цягнуцца да 22 лютага. На 21 лютага прызначаныя сустрэчы высокапастаўленых амэрыканскіх дыпляматаў зь міністрам замежных справаў Міхаілам Хвастовым, кіраўніком прэзыдэнцкай адміністрацыі Уралам Латыпавым й міністрам абароны Леанідам Мальцавым.
