Кучму абвінавацілі ў новай замове забойства :: Хартыя'97 :: Навiны

Народны дэпутат Украіны, кіраўнік камісіі Вярхоўнай Рады па кантролі за захаваньнем правоў грамадзянаў у парлямэнцкіх выбараў Аляксандар Ельяшкевіч лічыць, што прэзыдэнт Украіны Леанід Кучма замовіў на яго замах, учынены 9 лютага 2000 году. Пра гэта Ельяшкевіч заявіў падчас сёньняшняй прэсавай канфэрэнцыі, паведамляе Украіна.ru.

Паводле словаў дэпутата, падставаю для такога абвінавачаньня стала экспэртыза стужак былога маёра Дзяржаховы Мікалая Мельнічэнка, зробленая амэрыканскай кампаніяй Bek Tek.

“Ён (Кучма) забойца, ён арганізатар забойстваў і ён адкажа за гэта”, -- сказаў Ельяшкевіч.

Як паведаміў на прэсавай канфэрэнцыі старшыня часовай сьледчай камісіі Вярхоўнай Рады па расьсьледаваньні справы журналіста Гангадзэ Аляксандар Жыр, у распараджэньне камісіі прыйшла натарыяльна завераная справаздача Bek Tek аб праведзенай экспэртызе аўдыёзапісаў, зробленых Мельнічэнкам і датычных зьбіцьця Ельяшкевіча. Bek Tek прызнала сапраўдным запіс, дзе чалавек з голасам, падобным на голас Кучмы, абмяркоўвае зь невядомым замах на Ельяшкевіча.

Жыр паведаміў, што мае намер зьвярнуцца да Старшыні Вярхоўнай Рады з просьбай склікаць пазачарговую сэсію парлямэнту. Акрамя таго, вынікі амэрыканскай экспэртызы будуць накіраваныя да прэзыдэнта Парлямэнцкай Асамблеі Рады Эўропы, генэральнаму сакратару Рады Эўропы, кіраўнікам дзяржаваў і ўрадаў, парлямэнтам эўрапейскіх дзяржаваў.

У сваю чаргу Ельяшкевіч паабяцаў паведаміць дэталі замаху на судовым паседжаньні. “Я паведамлю, хто быў суразмоўцам Кучмы, хто і як мяне папярэдзіў аб падрыхтаваным замаху, хто дапамагаў мне пазьбегнуць сьмерці. Я хачу сказаць Кучме, што б са мной ня здарылася, ён нясе за гэта асабістую адказнасьць. Я буду падаваць зыск у суд на тэрыторыі іншай дзяржавы і кіраўніцтву нашай дзяржавы давядзецца адказваць гэтаму суду”, - -заявіў Ельяшкевіч.