Захацеў расеец нейкага саюзу :: Хартыя'97 :: Навiны

Так званы саюз Расеі й Беларусі быў і застаецца паняцьцем абстрактным. У гэтым і здолеў пераканацца растовец Сяргей Кудрын, вымушаны судзіцца з растоўскай мытняй адносна афармленьня аўтамабілю, вывезенага зь Беларусі. Грамадзянка Беларусі, як прадавала ў Віцебску Кудрыну “Mercedes-Benz” уручыла яму дакумэнты, згодна якіх аўтамабіль быў аформлены ў мытных адносінах на тэрыторыі Беларусі. 20 чэрвеня 2000 году Кудрын зьвярнуўся ў растоўскую мытню з просьбай выдаць яму пашпарт на машыну й пасьведчаньне на ейны вываз, каб паставіць аўтамабіль на ўлік ў ГИБДД. Аднак супрацоўнікі мытні адмовіліся выдаць гэтыя дакумэнты без правядзеньня мытнага афармленьня.

У выніку, колькі не спрабаваў растовец даказаць, што на тэрыторыі Беларусі й Расеі дзейнічае адзіная эканамічная й мытная прастора, вынік быў нулявым. Давялося зьвяртацца ў суд.

Спачатку суд – і раённы, і абласны – сталі на бок аўтаўладальніка. Але прэзідуюм абласнога суда, куды з касацыйнай скаргай зьвярнуліся мытнікі, адмяніў рашэньне суда раённага і адправіў справу на перагляд. У красавіку 2001 году суд Пралетарскага раёну Растова-на Доне вынес новае рашэньне, дзе адмова мытні ў выдачы дакумэнтаў і патрабаваньне прайсьці мытнае афармленьне, прызнаныя правамернымі. Гэтую правамернасьць пацьвердзіла затым і калегія абласнога суда па грамадзянскіх справах.

Так што зараз для таго, каб паставіць “Mercedes-Benz” на ўлік у ГИБДД пакупніку, які паверыў палітыкам, давядзецца такі аплаціць выдаткі па мытным афармленьні.