“Нафтан” і “Палімір” рыхтуюцца да акцыянаваньня :: Хартыя'97 :: Навiны

Калектывы двух буйнейшых прадпрыемстваў нафтахіміі РУА “Нафтан” і РУП “Палімір” у лютым на сваіх канфэрэнцыях прынялі рашэньне аб акцыянаваньні. Абодва прадпрыемствы маюць вострую патрэбу ў рэканструкцыі й мадэрнізацыі вытворчасьці. Толькі мадэрнізацыя установак “Нафтану” абыйдзецца ў 246 млн.даляраў. Акрамя таго, плянуецца “ажывіць” устаноўку АТ-8, якая з-за недахопу сыравіны ўжо прастойвае больш за 10 гадоў. З аналягічнымі патрэбамі сутыкаецца і “Палімір”. Склады аб’яднаньня заваленыя гатовай прадукцыяй. Яна неканкурэнтназдольная. Каб зьменшыць выдаткі на вытворчасьць прадукцыі й павысіць ейную якасьць, таксама абыйсьціся без мадэрнізацыі вытворчасьці, прадпрыемствы губляюць рынкі збыту. І вярнуцца на іх будзе няпроста. “Нафтан” ужо выцясьнілі з Украіны.

Нават пры тым, што за апошнія два гады перапрацоўка сыравіны на прадпрыемстве павялічылася на 20 адсоткаў, а ўдзельная вага экспартнай прадукцыі вырасла на 10 адсоткаў, з кожным днём ўсе больш складана ўтрымліваць пазыцыі. Выхад адзін – прыцягнуць інвэстыцыі акцыянэраў прадпрыемстваў.

Прапановы паступілі “Нафтану” ад расейскай кампаніі “Сургутнефтегаз”. Інтарэс праяўляюць да наваполацкіх прадпрыемстваў кампаніі “Славнефть”, “ЛУКойл” і “Итера”. Аднак кантрольны пакет акцыяў (50 адсоткаў плюс адна акцыя) застанецца ва ўласнасьці дзяржавы.

Існуе верагоднасьць аб’яднаньня “Нафтана”, “Паліміра” і ТЭЦ ў адзіны холдынг. Пакуль на “Нафтане” і “Паліміры” ідзе працэс падрыхтоўкі матэрыялаў па акцыянаваньні. Рэгістрацыя новых акцыянэрных таварыстваў заплянаваная на другую палову сакавіка.