У Кіеве разгромлены моладзевы выбарчы штаб блёку Цімашэнкі :: Хартыя'97 :: Навiны

Уначы з 26 на 27 лютага быў разгромлены моладзевы выбарчы штаб Блёку Юліі Цімашэнкі ў Кіеве, а аргтэхніка зьнічтожаная. Пра гэта УНИАН паведаміў кіраўнік штабу блёку Аляксандар Турчынаў. Акрамя таго, паводле словаў Тупчынава, 26 лютага ў кватэры намесьніка кіраўніка штабу Яраслава Фядарчука невядомыя выламілі ўваходныя дзьверы й правялі дагляд асабістых рэчаў, падобны на несанкцыянаваны вобшук і пагром. Паводле словаў Турчынава, відавочным зьяўляецца тое, што невядомых цікавілі дакумэнты, зьвязаныя з прафэсыйнай дзейнасьцю Фядарчука.

Турынаў нагадвае пра шэраг папярэдніх актаў, зьдзейсненых адносна блёку Юліі Цімашэнкі. У прыватнасьці, адзначыў ён, 25 лютага ў Харкаве па загаду губэрнатара Яўгена Кушнарова лідэру блёку без ніякіх тлумачэньняў адмовілі ў прадстаўленьні памяшканьня для сустрэчы з выбаршчыкамі. Акрамя таго, у Кіраваградзкім абласным штабе блёку быў праведзены вобшук нібыта з прычыны абяшкоджваньня выбухоўкі. Насамрэч, лічыць Турчынаў, ініцыятары гэтых акцыяў ставілі сабе за мэту паралізаваць выбарчую працу блёка. 26 лютага ў Палтаве прадстаўнікі МУС й камунальныя службы гораду пазрывалі рэклямныя матэрыялы блёка Юліі Цімашэнкі, і пра гэтым не зачапілі агітацыйных матэрыялаў іншых партыяў і блёкаў.

Усё вышэйзгаданае блёк Юліі Цімашэнкі расцэньвае як мэтанакіраваную й сьвядомую кампанію парвакацыяў супраць дэмакратычных апазыцыйных сілаў пад патранатам прэзыдэнта Леаніда Кучмы й ягонай адміністрацыі.

Блёк Юліі Цімашэнкі зьвяртаецца да прадстаўнікоў міжнародных арганізацыяў з просьбай адэкватна ацэньваць антызаконныя дзеяньні органаў улады ўсіх узроўняў і ацэньваць дэмакратычнасьць выбарчага працэсу не па пустых абацяньнях дзяржаўнага кіраўніцтва, а паводле рэальнай сытуацыі ў краіне.