Справа супраць сына Чыгіра сфабрыкаваная :: Хартыя'97 :: Навiны

У сваім выступе ў судзе Ленінскага раёну гораду Менску, на працэсе па справе Аляксандра Чыгіра, Антона Яшына, Зьмітра Юцкевіча ў якасьці абаронцы свайго сына Юлія Чыгір заявіла аб тым, што справа супраць ейнага сына сфабрыкаваная. Юлія Чыгір нагадала, што справа супраць сына была распачатая напярэдадні прэзыдэнцкіх выбараў. У сваім выступе ў паўтары гадзіны яна падрабязна распавяла аб дзеяньнях сьледчай групы, якія выходзілі, на яе думку, за рамкі закону. “Цалкам адсутнічаюць падставы верыць, што сьледзьва было аб’ектыўным”, -- зрабіла рэзюмэ Юлія Чыгір.

Яна зьвярнула ўвагу, што ў першыя дні пасьля арышту ў некаторых дзяржаўных СМІ разгарнулася кампанія па дыскрэдытацыі Чыгіра – у той час, калі яшчэ не былі затрыманыя Яшын і Юцкевіч. Яны не хаваліся, свабодна жылі ў Менску і езьдзілі на машынах, якія сьледчыя прадставілі як скрадзеныя.

Паводле ейных словаў, па Беларускай тэлевізіі, у парушэньне прэзумпцыі невіноўнасьці, ужо ішлі рэпартажы аб стварэньні Аляксандрам Чыгіром злачыннай групы для крадзяжу аўтамабіляў. Пры гэтым падкрэсьлівалася, што ён зьяўляецца сынам былога прэм’ер-міністра, а зараз аднаго зь лідэраў апазыцыі Міхаіла Чыгіра. Як адзначыла Юлія Чыгір, гэта лепш за ўсё сьведчыць пра палітычны характар справы. 1 сакавіка з апошнім словам на працэсе выступяць абвінавачаныя.

Трое маладых людзей, нагадаем, абвінавачваюцца ў крадзяжы аўтамабіляў (у асабліва буйным памеры). Напярэдадні пракурор прасіў суд прызначыць ім пакараньне ў выглядзе пазбаўленьня свабоды – Аляксандру Чыгіру тэрмінам на 7 гадоў. Антону Яшыну – на 8, Зьмітру Юцкевічу – на 11 гадоў і 6 месяцаў ў калёніі строгага рэжыму з канфіскацыяй маёмасьці. Абарона абвінавачаных, прывяла шматлікія факты, якія сьведчаць аб грубых парушэньнях закону, дапушчаных падчас папярэдняга сьледзтва супрацоўнікамі Сьледчага камітэту і аперупаўнаважанымі Маскоўскага РАУС гораду Менску. Паводле словаў адквакатаў, колькасьць гэтых парушэньняў, супярэчаньняў і іх характар такія, што сьведчаць аб фабрыкацыі справы, ягонай “падгонцы” да раней распрацаванага сцэнару, перадае БелаПАН.