Амэрыка націсьне на Гусэйна праз Лукашэнку :: Хартыя'97 :: Навiны

Амэрыка зьбіраецца ўвесьці санкцыі супраць Беларусі. Зрэшты, хвалявацца з-за гэтага варта не Лукашэнку, а Садаму Гусэйну. Пры ўсіх насьцярожаных адносінах Вашынгтону да “апошняй дыктатуры ў Эўропе”, якая засталася пасьля зьмены правячага рэжыму ў Югаславіі, раней на міжнародным узроўні размова аб санкцыях супраць Беларусі не заходзіла. Праўда, два месяцы таму пытаньне аб іх падымаў сэнатар Хэлмс ў кангрэсе ЗША, аднак так і ня выйшаў за ягоныя межы.

Сёньня амэрыканскую ініцыятыву агучыў прэсавы сакратар дзярждэпартамэнту Рычард Баўчар. Прычым фармулёўка была вельмі асьцярожнай. Як паведамляе Reuters, Баўчар “ня выключае верагоднасьці ўвядзеньня санкцыяў супраць Беларусі” – амэрыканцы па-ранейшаму падазраваюць, што адной з крыніц прыбытку рэжыму Аляксандра Лукашэнкі зьўяляецца ўзбраеньне краін “осі зла”, куды, як лічыць Джордж Буш, уваходзяць Ірак, Іран і Паўночная Карэя.

“ЗША вельмі сур’ёзна ставяцца да паведамленняў аб пастаўцы зброі тэрарыстам. Мы выкарыстоўваем розныя сродкі, уключна з увядзеньнем санкцыяў адносна краін, якія забясьпечваюць тэрарыстаў зброяй”—заявіў прадстаўнік дзярждэпу.

На мінулым тыдні такія заявы рабіліся ў Беларусі, куды з трохдзённым візытам прыбыла дэлегацыя амэрыканскага дзярждэпартамэнту на чале са Стывенам Пайфэрам. Напэўна, дадзеныя, якія ўдалося атрымаць ёй у Менску, і леглі ў аснову пазыцыі прэсавага сакратара дзярждэпартамэнту.

У адрозьненьне ад Баўчара, падазрэньні дэлегацыі Пайфэра былі дастаткова канкрэтнымі: “ЗША маюць дакладныя дадзеныя аб тым, што Беларусь прадае зброю краінам, якія падтрымліваюць тэрарызм”. Акрамя таго, як удакладніў Пайфэр, амэрыканскія спэцслужбы дакладна ведаюць, што там рыхтуюцца ваенныя кадры для Ірака й Ірану, якіх, у прыватнасьці, навучаюць карыстацца комплексамі супрацьпаветранай абароны С-300.

Трэба сказаць, што зьвесткі аб гандлі зброяй, які вядзецца пад кіраўніцтвам Лукашэнкі, траплялі ня толькі ў рукі амэрыканскай выведкі. Некалі аналягічнае расьсьледаваньне правялі журналісты НТВ і высьветлілі, што ледзь не палова транспартных самалётаў зь міжнароднага аэрапорту Менску вылятае ў Ірак.

Відавочна, Ірак непакоіць амэрыканцаў больш чым астатніх краін “осі зла”. Вашынгтон рэгулярна дае зразумець, што менавіта рэжым Садама Гусэйна – наступная пасьля Аўганістану цэль антытэрарыстычнай апэрацыі і, адпаведна, сапраўдная прычына палітычнага ціску на Беларусь. Такога кшталту заявы Дзярждэпу ў адрас афіцыйнага Менску могуць казаць толькі аб тым, што да пачатку апэрацыяў у Іраку засталося зусім няшмат.