ЗША і НАТА рыхтуюцца да ваенных навучаньняў ля межаў Беларусі :: Хартыя'97 :: Навiны

Шырокамаштабныя навучаньні Паўночнаатлянтычнага альянсу “Стронг рызолв-2002” (“Цьвёрдае рашэньне-2002”) пачынаюцца 1 сакавіка. Яны пройдуць на тэрыторыі Нарвэгіі й Польшчы. Манёўры будуць доўжыцца да 15 сакавіка. Пра гэта Стране.Ru заявілі расейскія ваенна-дыпляматычныя крыніцы. Пры гэтым яны адзначылі, што галоўнай мэтай навучаньняў стане праверка здольнасьці Ўзброеных сілаў НАТА праводзіць стратэгічныя апэрацыі на разнастайных тэатрах вайсковых дзеяньняў адначасова. Падчас навучаньняў, якія пройдуць ў непасрэднай блізкасьці зь межамі Расеі й Беларусі, будзе разглядацца наступная сытуацыя: на фоне актывізацыі ў памежных раёнах злачынных і тэрарыстычных груповак намецілася рэзкае абвастрэньне стасункаў паміж былымі рэспублікамі, “зь неаднародным этнічным складам насельніцтва”, у мінулым адной дзяржавы.

Кіраўніцтва адной з рэспублік рыхтуецца да прымяненьня сілы для абароны нацменшасьцяў у іншай краіне. Таксама магчымы памежны канфлікт. Для ўрэгуляваньня міжэтнічных рознагалосьсяў на тэрыторыі краіны, якой пагражае агрэсія ўводзяцца шматнацыянальныя сілы НАТА.

Да правядзеньня навучаньняў, акрамя камандаваньня й сілаў АУС НАТА (гэта 15 краін – удзельніц блёку, 150 тыс.асабістага складу, да 13 тысячаў адзінак наземнай тэхнікі, да 500 самалётаў і верталётаў, больш за 150 баявых караблёў і дапаможных судоў), будуць прыцягнутыя яшчэ каля 18 краін. У тым ліку ЗША на сваёй тэрыторыі прызавуць 70 тысячаў рэзэрвістаў. У якасьці назіральнікаў будуць прысутнічаць 50 прадстаўнікоў з 30 краін.

Да ўдзелу ў навучаньнях, акрамя АУС НАТА, прыцягваюцца: Швэцыя, Фінляндыя, Эстонія, Латвія, Літва, Аўстрыя, Славакія, Славенія, Баўгарыя й Румынія.