Акцыянаваньне нафтахімічных прадпрыемстваў адкладаецца :: Хартыя'97 :: Навiны

Дата 18 сакавіка 2002 году для стварэньня акцыянэрных таварыстваў на базе наваполацкіх ВА “Нафтан” і “Палімір” наўрадці рэальная праз вялікую колькасьць дакумэнтаў, якія неабходна прадставіць у шматлікія інстанцыі. Такое меркаваньне выказала 26 лютага экспэрт Міжнароднага цэнтру сацыяльна-эканамічнай палітыкі Тацяна Лінтоўская падчас паседжаньня “круглага стала” па пытаньнях акцыянаваньня, паведамляе БелаПАН.

Паседжаньне было арганізавана Наваполацка-Полацкай рэгіянальнай арганізацыяй СПБ. Аб тым, што “Нафтан” і “Палімір” могуць ужо 18 сакавіка быць пераўтвораныя з рэспубліканскіх унітарных прадпрыемстваў у адкрытыя акцыянэрныя таварыствы, заявіў нядаўна прэзыдэнт канцэрну “Белнафтахім” Іван Бамбіза падчас канфэрэнцыяў працоўных калектываў, якія прайшлі ў гэтых вытворчых аб’яднаньнях. Аднак, як лічыць экспэрт Лінтоўская, працэдура акцыянаваньня для Беларусі – новая, і розныя інстанцыі будуць вытрымліваць крайнія тэрміны разгляду дакумэнтаў з тым, каб пазьбегнуць памылак. Зараз сярод працоўных “Нафтану” актыўна ідзе збор заявак на набыцьцё акцыяў, прычым, усе заяўкі павінны быць запоўеныя да 7 сакавіка.

Разам з тым, паводле зьвестак з адміністрацыяў гэтых прадпрыемстваў, калі работнікі ”Паліміру” змогуць прэтэндаваць на 8-10 адсоткаў акцыяў, то рабочыя “Нафтану” – максімум на 2 адсоткі. Такой колькасьці акцый, лічыць Лінтоўская, недастаткова для таго, каб уплываць на эканамічную палітыку прадпрыемства.