Генэральны сакратар Рады Эўропы заклікае рэжым адмовіцца ад сьмяротнага пакараньня :: Хартыя'97 :: Навiны

Генэральны сакратар Рады Эўропы Вальтэр Швімэр заклікаў беларускія ўлады не асуджаць да сьмяротнага пакараньня Валеры Ігнатовіча, Максіма Маліка, Аляксея Гуза й Сяргея Савушкіна, якім сёньня, 11 сакавіка, у 11.00 у Менскім абласным судзе будзе аб’яўлены прысуд. Нагадем, што менавіта такога пакараньня за шматлікія злачынствы, у тым ліку выкраданьне аператара ГРТ Завадзкага, якія інкрымінуюцца бандзе былога “алмазаўца” Ігнатовіча, запатрабаваў дзяржаўны абвінаваўца пракурор Хведар Шэдаў. “Сьмяротнае пакараньне супярэчыць усім прынятым стандартам правоў чалавека. Я заклікаю пракурора адмовіцца ад яе раз і назаўсёды”, - сказаў Швімэр.

У нядаўнім звароце Аляксандар Лукашэнка сказаў, што Беларусь будзе разглядаць Раду Эўропы як найбольш важнага партнёра ў дыялёгу з супольнасьцю эўрапейскіх дзяржаваў, таму спадар Швімэр падкрэсьліў важнасьць мараторыя на сьмяротнае пакараньне для дасягненьня ўзнаўленьня працэдуры далучэньня. Ён таксама даў зразумець, што “Беларусь ніколі ня здолее спадзявацца на разгляд ейнага членства ў Радзе Эўропы, пакуль яна працягвае гэтыя жорсткія пакараньні – таму я настойліва заклікаю Беларусь як мага хутчэй пачаць увядзеньне мараторыя”.

У той самы час генэральны сакаратар выказаў надзею, што Беларусь усё ж такі будзе ісьці па шляху дэмакратычнага разьвіцьця, прымаючы канкрэтныя меры, такія як становішча з асноўнымі правамі й свабодамі, увядзеньне пасады незалежнага амбудсмэну й увядзеньне мараторыя на сьмяротнае пакараньне.