11 сакавіка павінен быў быць вынесены прысуд беларускім міліцыянтам, якія абвінавачваюцца ў выкраданьні апэратара ГРТ Зьміцера Завадзкага. Абвінавачаньне патрабавала расстрэлу. Тэлежурналіст Павал Шарамет лічыць, што пасьля гэтага даказаць віну арганізатара выкраданьня, генпракурора Беларусі Віктара Шэймана, будзе немагчыма.

---

Аб’яднаная грамадзянская партыя працягвае настойваць на атрыманьні аб’ектыўнай, дакладнай інфармацыі аб продажы ўладамі Беларусі зброі, пачынаючы з 1996 году. На гэты раз АГП публічна зьвяртаецца да генэральнага пракурора з наступнымі пытаньнямі: ці мае намер ягонае ведамства правесьці расьследаваньне ўсіх зьдзелак па продажы зброі з 1996 году? Ці мае намер Рэспубліканская пракуратура агучыць на чыіх рахунках знаходзіліся шматмільённыя сумы? Хто і як імі распараджаўся?

---

На фоне надыходзячай прыватызацыі шасьці прадпрыемстваў беларускай нафтахіміі засталася ў цені падрыхтоўка да акцыянаваньня буйнейшага тэлевізійнага заводу краіны. 6 сакавіка на МВА “Гарызонт” адбылася канфэрэнцыя працоўнага калектыву, на якой большасьць з 285 дэлегатаў ад усіх структурных падразьдзелаў аб’яднаньня прагаласавалі за акцыянаваньне айчыннага тэлевізійнага гіганта. Гэта ўжо трэцяя спроба акцыянаваць “Гарызонт”. Першая мела месца яшчэ ў далукашэнкаўскі пэрыяд – у 1993-м, другая – у 1997 годзе. У абодвух выпадках па розных прычынах далей намераў справа не пайшла.

---

Расейская піваварная кампанія “Балтыка” мае намер дэманціраваць сваё абсталяваньне на менскім піўзаводзе “Крыніца”. Пра гэта заявіў віцэ-прэзыдэнт “Балтыкі” Адам Тлехурай у інтэрвію штотыднёвіку “Белорусская газета”.

---

Чыстыя замежныя актывы банкаўскай сыстэмы Беларусі склалі на 22 лютага 2002 году $264,1 млн., і скраціліся з пачатку гэтага году на 21,8%. Пра гэта паведамілі ў Нацыянальным банку рэспублікі. Замежныя актывы склалі $653,6 млн. ($688,2 млн. на 1 студзеня 2001 году), замежныя пасівы - $389,5 млн. ($322,2 млн. на 1 студзеня 2001 году). З пачатку 2002 году чыстыя замежныя актывы банкаў Беларусі зьнізіліся на $2 млн. (на 1,8%) і склалі на 22 лютага 2002 году $106,7 млн. Замежныя актывы банкаў склалі $281,7 млн., замежныя пасівы - $175 млн.

---

На мінулым тыдні (4-10 сакавіка) курс даляра США да беларускага рубля вырас на ўсіх сэгмэнтах валютнага рынку. На таргах валютна-фондавай біржы даляр падаражэў на 0,3 адсоткі (з 1.670 да 1.675 рублёў), эўра - на 1,7 (з 1.446 да 1.470), расейскі рубель - на 0,1 (з 53,97 да 54,04). На "чорным" рынку наяўнай валюты курс даляру павялічыўся на 0,9 адсоткі (з 1.675 да 1.690 рублёў пры набыцьці, з 1.685 да 1.700 рублёў пры продажу), паведамляе БелаПАН.

---

На два тыдні спынена праца гарадзенскага заводу “Белкард”. Паводле інфармацыі, распаўсюджанай на прадпрыемстве, прычынай спыненьня заводу стала перапаўненьне гатовай прадукцыяй. У сувязі з тым, што Расея наладзіла сваю вытворчасьць карданных валаў, “Белкард” пазбавіўся магчымасьці збываць сваю прадукцыю на расейскім рынку. Работнікі прадпрыемства адпраўленыя ў вымушаны адпачынак на два тыдні за свой кошт.

---

На складах беларускіх прамысловых прадпрыемстваў зноў сталі расьці запасы гатовай прадукцыі. Паводле дадзеных Міністэрства статыстыкі й аналізу, калі на 1 студзеня запасы скаладалі 63,8 адсоткі ад сярэднемесячнага аб’ёму вытворчасьці прадукцыі, то на 1 лютага - 65,8 адсоткі. У грашовыя выяўленьні запасы павялічыліся з 747,9 да 842,4 млрд. рублёў, ці з 473,4 да 513,3 млн. даляраў ЗША ў пераліку па афіцыйным курсе на вышэйназваныя даты.

---