АГП патрабуе ад Шэймана справаздачы па гандлі зброяй :: Хартыя'97 :: Навiны

Аб’яднаная грамадзянская партыя працягвае настойваць на атрыманьні аб’ектыўнай, дакладнай інфармацыі аб продажы ўладамі Беларусі зброі, пачынаючы з 1996 году. На гэты раз АГП публічна зьвяртаецца да генэральнага пракурора з наступнымі пытаньнямі: ці мае намер ягонае ведамства правесьці расьследаваньне ўсіх зьдзелак па продажы зброі з 1996 году? Ці мае намер Рэспубліканская пракуратура агучыць на чыіх рахунках знаходзіліся шматмільённыя сумы? Хто і як імі распараджаўся?

АГП заяўляе пра сваё права разьлічваць на судзеяньне парваахоўчых органаў, уключна з пракуратурай, у расьсьледаваньні фактаў непадкантрольнага выдаткаваньня “збройных грошай”. Аднак як вынікае з адказу, атрыманага нядаўна партыяй з Пракуратуры РБ за подпісам пракурора І.А.Кандрусіка, гэтыя пытаньні знаходзяцца па-за кампэтэнцыяй пракуратуры.

Аналізуючы адказ, АГП мяркуе, што кіраўніцтва Пракуратуры сьвядома ухіляецца ад расьследаваньня ўсіх абставінаў, зьвязаных са збройным бізнэсам. Наўрадці ў гэтым ёсьць зацікаўленасьць шэраговых супрацоўнікаў органаў пракуратуры, лічыць АГП і ставіць наступнае пытаньне: “Тады хто пераўтварае пракуратуру ў “дах” для сумнеўных зьдзелак і апэрацыяў?”

Сфармуляваныя пытаньні генэральнаму пракурору Беларусі АГП просіць разглядаць як афіцыйны зварот.