Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Праваабаронцы патрабуюць спыніць перасьлед журналістаў «Пагоні» 11:12, 13/03/2002
Беларускія праваабарончыя арганізацыі – Беларускі Гэльсынскі камітэт, Праваабарончы цэнтар “Вясна”, “Цэнтар па правох чалавека” і “Прававая дапамога насельніцтву” – накіравалі зварот да Аляксандра Лукашэнкі, генэральнага пракурора Беларусі й пракурора Гарадзенскай вобласьці ў сувязі з крымінальным перасьледам журналістаў закрытай уладамі недзяржаўнай газэты “Пагоня”.
Праваабарончыя арганізацыі заяўляюць, што”сваімі дзеяньнямі беларускія ўлады ў чарговы раз дэманструюць зьнявагу прынцыпаў свабоды слова, права на свабоднае атрыманьне й распаўсюд інфармацыі, права на свабоду меркаваньняў і іхнае свабоднае выказваньне”.
Крымінальны перасьлед незалежных сродкаў масавай інфармацыі, на думку аўтараў звароту, сьведчыць пра працяг канфрантацыі паміж дзяржаўнымі ўладамі й грамадзтвам.
Праваабарончыя арганізацыі лічаць, што ўціск, які аказваецца на прадстаўнікоў незалежных СМІ, зьвязаны зь іх нязьменнай пазыцыяй па адстойваньню дэмакратычных каштоўнасьцяў, асабліва падчас выбарчай кампаніі.
Праваабаронцы заклікаюць органы ўлады неадкладна спыніць крымінальны перасьлед галоўнага рэдактара “Пагоні” Мікалая Маркевіча й журналіста Паўла Мажэйкі.
