Амбасадар ЗША пры АБСЭ заяўляе аб працягу рэпрэсіяў у Беларусі :: Хартыя'97 :: Навiны

Амбасадар ЗША пры Сталай радзе АБСЭ Стэфан Мінікес зьвярнуўся да Сталай рады АБСЭ ў Вене з адкрытай заявай адносна нядаўняга затрыманьня ў Беларусі мікрааўтобуса АБСЭ з 10 прадстаўнікамі палітычных партыяў і няўрадавых арганізацыяў, якія ехалі на канфэрэнцыю ў Літву. Ніжэй чытайце тэкст выступу Стэфана Мінікеса цалкам:

“Дзякую вам, спадар старшыня,

Грамадзянская супольнасьць, пабудаваная на прынцыпах плюралізму, свабодная ад перасьледу і застрашэньняў, зьяўляецца абавязковай умовай для разьвіцьця дэмакратычных інстытутаў. Абарона грамадзянскай супольнасьці прадугледжваецца абавязацельствамі АБСЭ.

Аднак, нягледзячы на гэта, мы зноў бачым, як грамадязнская супольнасьць у Беларусі падвяргаецца ўціску.

Сп.старшыня, Злучаным Штатам стала вядома, што 1 сакавіка беларускімі мытнікамі на памежным пераезьдзе Горадні былі затрыманыя на шэсьць гадзінаў і абшуканыя 10 прадстаўнікоў палітычных партыяў і няўрадавых арганізацыяў, якія накіроўваліся ў Літву. Дэлегацыя знаходзілася ў мікрааўтобусе АБСЭ з дыпляматычнымі нумарамі. Аўтобус таксама быў падвергнуты мытнаму дагляду.

Двухдзённая канфэрэнцыя пад назовам “Пэрспэктывы супрацоўніцтва зь Беларусяй”, на якую накіроўваліся дэлегаты, была наладжана Інстытутам міжнародных зносінаў і палітычных навук віленскага унівэрсытэту.

Канфэрэнцыя зьявілася вынікам намаганьняў ўрадаў, уключна зь некаторымі прадстаўнікамі за гэтым сталом, а таксама няўрадавых арганізацыяў. Па правядзеньні канструктыўнага абмену думкамі паміж усімі бакамі беларускага грамадзтва й міжнароднай супольнасьцю зацікаўленых назіральнікаў.

Такога кшталту дыялёг вельмі неабходны для ліквідацыі перашкодаў на шляху да дэмакратызацыі Беларусі. Мы ўдзячны Кансультатыўна-назіральнай групе (КНГ) за ейную падтрымку гэтага дыялёгу.

Аднак, разам з тым, каб ухапіццца за такую магчымасьць, беларускія ўлады ў чарговы раз скарысталіся ёй для перасьледу й застрашэньня, як фізычнага, так і эмацыянальнага, вядомых прадстаўнікоў беларускай грамадзянскай супольнасьці.

Дадзены акт зьяўляецца паказальным у святле нападаў, якім падвяргаецца грамадзянская супольнасьць, незалежныя СМІ і прафсаюзны рух пасьля верасьнёўскіх прэзыдэнцкіх выбараў.

Сп.старшыня, Злучаныя Штаты заклікаюць Беларусь захоўваць узятыя на сябе абавязкі перад АБСЭ й Мэмарандуму па ўзаемаразуменьні з АБСЭ і падтрымаць разьвіцьцё грамадзянскай супольнасьці.

Акрамя таго, Злучаныя Штаты заклікаюць рэжым Лукашэнкі да супрацоўніцтва з КНГ й новым кіраўніком місіі для прадухіленьня паўтарэньня такога кшталту інцыдэнтаў у будучыні”.