Расейцы прыйдуць на "Белтрансгаз" :: Хартыя'97 :: Навiны

У хуткім часе плянуецца стварэньне сумеснага беларуска-расейскага прадпрыемства, якое будзе займацца пастаўкамі газу. Гэтае пытаньне абмяркоўвалася падчас візыту ў Менск расейскага прэм`ера Міхаіла Касьянава. Міністар эканомікі Ўладзімер Шымаў паведаміў журналістам, што яно будзе займацца пастаўкамі, транспартаваньнем і абслугоўваньнем транзыту газу. Шымаў дадаў, што сумеснае прадпрыемства мусіць стварацца на базе "Белтрансгазу".

Як паведамляе Радыё Рацыя, ніякіх іншых падрабязнасьцяў міністар пакуль не паведаміў. Яшчэ невядома, якую частку прадпрыемства атрымае расейскі бок, а якую беларускі, ці будуць у ім удзельнічаць прыватныя прадпрыемствы. Паводле словаў Шымава, пакуль абмяркоўваецца мэтазгоднасьць стварэньня такога прадпрыемства, аднак ніякіх канкрэтных рашэньняў яшчэ няма. Прэм`еры прынцыпова дамовіліся пра стварэньне прадпрыемства. І цяпер прадстаўнікі ўрадаў Расеі ды Беларусі будуць весьці перамовы наконт канкрэтных умоваў.

Трэба адзначыць, што расейскі бок на працягу некалькіх гадоў выказваў зацікаўленасьць да прадпрыемства "Белтрансгаз". "Газпром" імкнуўся ўзяць удзел у акцыянаваньні "Белтрансгазу" і, каб паскорыць гэты працэс, нагадваў беларускаму кіраўніцтву пра запазычанасьць па пастаўках газу. Аднак да сёньняшняга дня "Белтрансгаз" заставаўся беларускім прадпрыемствам. Выглядае, што спраўджваюцца прагнозы наконт пранікненьня расейскага капіталу ў стратэгічна важныя сфэры эканомікі Беларусі.