Апазыцыя ня верыць у аб’ектыўнасьць суда па справе “групы Ігнатовіча” :: Хартыя'97 :: Навiны

Прадстаўнікі апазыцыі ня вераць у аб’ектыўнасьць расьсьледаваньня й прысуду суда па справе “групы Ігнатовіча”. “Палітычная афарбоўка гэтай справы была відавочнай з самага пачатку. Ігнатовіч й ягоная група сталі “скрайнімі”, на якіх спрабуюць сьпісаць усе злачынствы. Справа Завадзкага адкладаецца да разгляду па сутнасьці”, -- лічыць лідэр Аб’яднанай грамадзянскай партыі Анатоль Лябедзька. На ягоную думку, у Беларусі не існуе незалежнай судовай улады.

Той факт, што суд ня вынес Ігнатовічу й сябрам ягонай групы сьмяротнага прысуду (пра гэта беларускія ўлады прасіла Рада Эўропы), Лябедзька расцэньвае як “спробу заігрываньня” афіцыйнага Менску з Эўропай у надзеі выцягнуць пасьля з гэтага “палітычныя дывідэнты”.

Лідэр Партыі БНФ Вінцук Вячорка пракамэнтаваў прысуд суда так: “У Беларусі адсутнічае незалежная судовая сыстэма, а існуе палітычны заказ кіраўніцтва краіны на любы працэс, вынікі якога могуць паўплываць на разьвіцьцё сытуацыі й грамадзкую думку”. Гэты працэс, адзначыў Вячорка, быў закрыты ад грамадзтва, і таму, “ у выпадку рэальнай дэмакратызацыі, павінна праводзіцца паўторнае сьледзтва і паўторны суд па гэтай справе”. “Я ўжо не кажу аб тым, што фармальнае расьсьледаваньне было праведзенае толькі па адным зьніклым, а паводле астатніх зьніклых сытуацыя як была цёмнай , так і засталася. Гэта выклікае абгрунтаваныя падазрэньні ў грамадзтве”, -- падкрэсьліў Вячорка.

Нагадаем, што 14 сакавіка калегія Менскага абласнога суда прызнала даказанай віну гэтай злачыннай групы, якую ачольваў былы супрацоўнік спэцпадразьдзелаў МУС Беларусі “Алмаз” Валеры Іганатовіч. У забойстве, шэрагу разбойны нападаў, а таксама ў выкраданьні апэратара ГРТ Зьмітра Завадзкага. В.Ігнатовіч і М.Малік асуджаныя да пажыцьцёвага заключэньня, астатнія сябры ягонай групы – да пазбаўленьня волі на тэрмін ад 12 да 25 гадоў. Працэс быў закрытым, прадстаўнікоў грамадзякасьці да яго дапусьсцілі толькі на агучваньне прысуду.