Павал Шарамет: да зьнікненьня Завадзкага датычны Шэйман :: Хартыя'97 :: Навiны

Сябра й калега Зьмітра Завадзкага Павал Шарамет працягвае настойваць на датычнасьці генэральнага пракурора Беларусі Віктара Шэймана да зьнікненьня апэратара ГРТ Зьмітра Завадзкага. Шарамет таксама лічыць, што на працэсе па справе аб зьнікненьні журналіста наўмысна абыйшлі ўвагаю роль спэцслужбаў у зьнікненьні Завдазкага. Журналіст таксама заявіў, што паводле ягоных дадзеных, у расейскіх праваахоўных органах ёсьць матэрыялы, якія могуць дапамагчы ў расьследаваньні здарэньня з Завадзкім, але гэтыя матэрыялы трымаюцца ў сакрэце. Акрамя таго, Шарамет лічыць, што Зьмітра Завадзкага ўжо няма жывым.

“Застаўся недасьледаваным удзел у справе Леваненкі, былога афіцэра службы бясьпекі прэзыдэнта, зараз афіцэра “Алмазу”, які быў затрыманы, а зараз праходзіць як сьведка. Чаму яго правялі ў іншы статус, незразумела, наколькі мне вядома. Супраць яго былі вельмі істотныя доказы. Што да ролі Аляксандра Лукашэнкі ў гэтай гісторыі, то, спасылаючыся на Бажэлку, можна казаць аб магчымай датычнасьці да справы яго бліжэйшага памочніка Віктара Шэймана”, -- заявіў Шарамет у інтэрвію Радыё Свабода.

У камэнтары вынікаў працэсу па справе “групы Ігнатовіча” Шарамет выказаў меркаваньне, што Зьмітра Завадзкага ўжо няма жывым. Пры гэтым Павал Шарамет спасылаўся на былога генпракурора Беларусі Алега Бажэлку:

“Яго катавалі, зламілі хрыбетніцу й вырашылі дабіць, таму што інакш немагчыма было схаваць гэтае злачынства. Ад яго дабіваліся, што яму вядома аб сакрэтнай апэрацыі беларускіх уладных колаў на Каўказе, у Чачэніі. Гэтай вэрсіі трымаўся Алег Бажэлка, і яна мне падаецца на дадзены момант самай верагоднай”.