Арыштаваны лідэр сацыял-дэмакратаў Мікалай Статкевіч :: Хартыя'97 :: Навiны

Лідэр Сацыял-дэмакратычнай партыі Беларусі (Народная Грамада) Мікалай Статкевіч затрыманы праваахоўчымі органамі Менску й зьмешчаны ў гарадзкі прыёмнік-разьмеркавальнік. Падставаю для затрыманьня палітыка стала арганізацыя ім 15 сакавіка несанкцыянаванай уладамі вулічнай акцыі, прымеркаванай да Дня канстытуцыі Беларусі.

Статкевічу ўдалося вывесьці на мітынг у цэнтр гораду прыкладна 500-600 чалавек. І хаця ніякіх інцыдэнтаў падчас акцыі не было зафіксавана, “відавочным быў факт грубага парушэньня дзейнага заканадаўства, што выявілася ў арганізацыі несанкцыянаванага шэсьця”, заявіў журналістам міністар унутраных справаў Беларусі Ўладзімера Навумаў.

Пасьля сканчэньня акцыі ў офіс партыі, дзе адбылася прэсавая канфэрэнцыя старшыні БСДП (НГ), прыбылі два афіцэры міліцыі й ўручылі Статкевічу позву зьявіцца да 21.00 гэтага дня ў РАУС Савецкага раёну Менску “у якасьці сьведкі”. Яны настойліва прапанавалі зрабіць гэта неадкладна, прычым у іхным суправаджэньні. Побач з офісам стаялі дзьве міліцэйскія машыны, у якіх знаходзіліся супрацоўнікі МУС, і аўтобус, забіты людзьмі ў камуфляжнай форме. Каб не дапусьціць штурму офісу (як гэта было раней) і затрыманьня прысутных, Статкевіч пагадзіўся праехаць зь міліцыянтамі ў РАУС. Як стала вядома пазьней, бліжэй да ночы лідэр беларускіх сацыял-дэмакратаў быў там затрыманы й дастаўлены з РАУС Савецкага раёну ў спэцпрыёмнік-разьмеркавальнік УУС Менгарвыканкаму на вуліцы Акрэсьціна.

Лідэр сацыял-дэмакратаў будзе знахадзіцца ў прыёмніку-разьмеркаавльніку да правядзеньня суда, які павінен адбыцца ў панядзелак.

Нагадаем, гэта ня першы выпадак удзелу Статкевіча ў несанкцыянаваных уладамі акцыях партэсту. Так, у чэрвені 2000 году Менскі гарадзкі суд асудзіў Мікала Статкевіча да двух гадоў турмы з адтэрміноўкай прысуду на два гады – па абвінавачаньні ў арганізацыі Маршу свабоды 17 кастрычніка 1999 году.