Жахлівае зьбядненьне беларускага народу :: Хартыя'97 :: Навiны

Паводле дадзеных Міністэрства статыстыкі і аналізу, у IV кварталі 2001 году сярэднестатыстычная беларуская сям’я штомесяц расходавала амаль 196 тысячаў рублёў, ці каля $126. Атрымоўваецца, што па ўсіх артыкулах выдаткаў насельніцтва Беларусі фармуе гадавы рэальны попыт на $5,8 млрд. УВП краіны складае 12 мільярдаў даляраў. З афрыканскага пункту гледжаньня, гэта, вядома, ня беднасьць, але ня той узровень унутранага попыту, які мог бы гарантаваць устойлівы эканамічны рост без прыцягненьня замежных інвэстыцыяў й лібэралізацыі бізнэсу, адзначае “Белорусская газета”.

Па-ранейшаму большая палова грошай (53,3%) беларускія сем’і выдатковаюць на прадукты харчаваньня. Пэнсіянэры практычна ня ходзяць у кавярні, тым больш у рэстарацыі, ня маюць грошай на табак, але на алькаголь трацяць болей, чым на транспарт, прадметы асабістай гігіены й практычна столькі сама, колькі на ахову здароўя.

Менш за 20% беларускіх сем’яў харчуюцца па-за домам. Менчукі па гэтым артыкуле выдаткуюць у 9 разоў болей, чым вяскоўцы. Паводле дадзеных апытаньня, звыш 52% сем’яў не набываюць алкаголь (можна сабе уявіць маштаб вырабу самагону й выкарыстаньне гарэлкі ў якасьці валюты, бо выдаткі вясковых і гарадзкіх сем’яў прыкладна аднолькавыя), 70% -- не набываюць цыгарэты, а 38,5% сям’яў не выдаткоўваюць грошы на прадметы асабістай гігіены.

Аказваецца, амаль 2,5 млн. беларусаў не набываюць мыла, шампунь ці зубную пасту, ня кажучы ўжо пра сродкі з крылыцамі ці вяровачкамі. Гэта сьведчыць або пра скрайне нізкія стандарты гігіены, або, што больш верагодна, пра тое, што старым і маладым сем’ям гэтыя сродкі набываюць іхныя сваякі ці што яны карыстаюцца старымі запасамі гаспадарчага мыла й пральнага парашку.

Больш за 20% сям’яў не набываюць лекі і не карыстаюцца мэдычнымі паслугамі і аддаюць перавагу ці спадручным сродкам, ці абліцьцю халоднай вадой. Толькі 21,3% сем’яў прызнаюцца, што трацяць грошы на падаткі й ўнёскі, што ў год дае каля $66 млн. Напэўна таму грамадзяне не адчуваюць сябе падаткаплацельшчыкамі й не разумеюць, што ўсе грошы, якімі распараджаюцца мясцовыя органы ўлады, урад і Лукашэнка, - гэта тыя рэсурсы, якія былі канфіскаваныя менавіта ў грамадзян.