МУС стараецца ў расьсьледаваньні “крэдытных” справаў :: Хартыя'97 :: Навiны

Праваахоўчыя органы працягваюць расьследаваць справы аб вымантачаньні й рабаваньні крэдытаў. Днямі ў адзін з раённых судоў Менску была перададзеная справа адносна Юры Ролева, дырэктара ААТ ПТЦ “Захад-1”. У 1994 годзе абвінавачаны крэдытаваўся тады яшчэ ў банку “Беларусь” пад прадлогам гандлёва-закупачнай дзейнасьці. Зараз, як паведамляе “Белорусская газета”, ён у СІЗА.

Абставіны справы Ролева не пазбаўленыя інтарэсу – бізнэсоўцу ўдалося ўцягнуць у працэс атрыманьня крэдыту такое буйное менскае прадпрыемства, як АТ “Менскі завод гадзіньнікаў”. Дамова з банкам “Беларусь” падпісана на падставе гарантыйнага абавязацельства заводу. Той, у сваю чаргу, пачаў цікавіцца шматабяцальным кантрактам паміж прадпрыемствам Ролева і баўгарскай фірмай “Трыбія”, якая мела намер пастаўляць у Беларусь кампот, агуркі і іншую кансэрваваную прадукцыю.

Сьледзтва высьветліла, што частка дакумэнтаў – падробленыя. Каб грашовыя сродкі працягвалі пералічвацца на рахунак “Трыбіі”, дырэктар беларускай фірмы “працягваў неаднаразова складаць і прадастаўляць у АКБ “Беларусь” наўмысна ілжывыя дакумэнты” – акты прыёмкі-перадачы тавару. Тым не менш свой кампот Беларусь так і не атрымала. У справе ёсьць інфармацыя аб тым, што на крэдытныя грошы Ролеў зьбіраўся набыць у асабістую маёмасьць нерухомасьць, разьмешчаную на тэрыторыі Баўгарыі.

Зрэшты, ніводзін з плянаў абвінавачанаму не ўдаўся. Адбылося гэта, паводле ягоных словаў, праз недабрасумленнасьць баўгарскага партнёра й несвоечасовасьці пералічэньня крэдытных сродкаў банкам “Беларусь”. Са свайго боку, сьледзтва сабрала доказы, якія сьведчаць аб датычнасьці дырэктара фірмы да вымаганьня крэдыту й махлярства ў асабліва буйным памеры. Ступень віны Ролева вызначыць суд. Падчас разьбіральніцтваў у крымінальным працэсе банк атрымае магчымасьць прад’явіць абвінавачанаму зыск. Вядома таксама, што з рашэньня суда “Менскі завод гадзіньнікаў” вызвалены ад фінансавай адказнасьці.

На дадзены момант у вытворчасьці Ўпраўленьня сьледчага камітэту МУС па Менску знаходзіцца 51 крымінальная справа. У агуле асобы, якія фігуруюць у якасьці абвінавачаных, запазычылі $13 718 700, DM 350 тыс. і 19 323 тыс. рублёў. На сёньня 28 даўжнікоў знаходзяцца ў вышуку. Сярод абвінавачаных і банкаўскія работнікі – 11 крымінальных справаў адносна службовых асобаў фінансавых установаў па матэрыялах расьследаваньня “крэдытных” спрваў. “Лідэры” у сьпісе пацярпелых – банк “Поиск”, “Белпромстройбанк”, “Белагропромбанк”. За 2001 г. заёмнікі гэтых і іншых банкаў вярнулі $916 674 і 25 100 500 рублёў.