У Наваполацку йдзе вайна за міні-рынкі :: Хартыя'97 :: Навiны

У Наваполацку Незалежны прафсаюз прыватных прадпрымальнікаў пачаў акцыю пратэсту. Як паведамляе карэспандэнт “Известий”, бізнэсоўцы разгортаваюць кампанію па адмене рашэньня мясцовых уладаў, якое фактычна ставіць задачу закрыць міні-рынкі гораду.

З сакавіка 2002 году на міні-рынкі аплата ганлёвых месцаў для бізнэсоўцаў, гандляроў прадуктамі й прамысловымі таварамі, рэзка падскочыла – ад 3 да 10 разоў па розных катэгорыях тавараў. Рада гарадзкой арганізацыі АГП й Незалежны прафсаюз накіравалі ў гарвыканкам і ў прэсу заяву, у якой называюць рашэньне гарвыканкаму “уціскам бізнэсоўцаў і прадпрымальніцтва”.

На дадзены момант праходзіць збор подпісаў жыхароў гораду пад патрабаваньнем адмены рашэньня гарвыканкаму. Сабраныя подпісы ініцыятары акцыі пратэсту маюць намер перадаць у гарсавет з патрабаваньнем склікаць пазачарговую сэсію гарсавету для разгляду гэтага пытаньня.

У выпадку, калі рашэньне па міні-рынках ня будзе адмененым ці скарэктаваным, адбудзецца папераджальная забастоўка бізнэсоўцаў, якія працуюць на міні-рынках і цэнтральным рынку Наваполацку.